గుడివాడ వన్‌టౌన్‌ ఎస్‌ఐపై వేటు..

కృష్ణా జిల్లా గుడివాడ వన్‌టౌన్‌ ఎస్‌ఐ వై.వి.వి. సత్యనారాయణను వీఆర్‌కు పంపుతూ జిల్లా ఎస్పీ కార్యాలయం నుంచి ఆదేశాలు వెలువడ్డాయి. మెగా డీఎస్సీలో అక్రమాలు జరిగాయంటూ ఈ నెల 10న గుడివాడ పట్టణంలో YSRCP నిర్వహించిన ర్యాలీ నేపథ్యంలో ఈ పరిణామం చోటుచేసుకుంది. ర్యాలీకి అనుమతి లేదని పేర్కొంటూ మాజీ మంత్రి కొడాలి నానికి ఎస్‌ఐ సత్యనారాయణ నోటీసు అందించారు.

అయితే పోలీసులు అనుమతి నిరాకరించినప్పటికీ కొడాలి నాని పోలీసుల ఆదేశాలను పట్టించుకోకుండా YSRCP శిబిరం వద్దకు వెళ్లినట్లు సమాచారం. ఈ క్రమంలో చోటుచేసుకున్న పరిణామాల నేపథ్యంలో ఎస్‌ఐ సత్యనారాయణను వీఆర్‌కు పంపుతూ జిల్లా పోలీసు ఉన్నతాధికారులు ఆదేశాలు జారీ చేసినట్లు తెలుస్తోంది. ఎస్‌ఐపై తీసుకున్న చర్యలకు సంబంధించిన పూర్తి వివరాలు అధికారికంగా వెల్లడికావాల్సి ఉంది.