కోహ్లీ మాటలు నాలో ధైర్యం నింపాయి - జార్డన్ కాక్స్

ఇంగ్లండ్ యువ క్రికెటర్ జార్డన్ కాక్స్ విరాట్ కోహ్లీతో తన అనుభవాలను పంచుకున్నాడు. ఐపీఎల్‌ 2026లో రాయల్ ఛాలెంజర్స్ బెంగళూరు (ఆర్సీబీ) తరఫున తుది జట్టులో ఆడే అవకాశం రాకపోయినా, డ్రెస్సింగ్‌ రూమ్‌లో కోహ్లీతో గడిపిన క్షణాలు తన జీవితాన్ని మార్చేశాయని చెప్పాడు. పెద్ద మ్యాచ్‌లు, అరంగేట్ర సమయంలో ఎదురయ్యే ఒత్తిడిని ఎలా ఎదుర్కోవాలో కోహ్లీ తనకు విలువైన సలహాలు ఇచ్చాడని కాక్స్ తెలిపాడు. జీవితంలో అరంగేట్రం ఒక్కసారే వస్తుందని, తన కోసం కష్టపడిన వారి త్యాగాలను గుర్తుంచుకుని మైదానంలో అత్యుత్తమ ప్రదర్శన ఇవ్వాలని కోహ్లీ సూచించినట్లు వెల్లడించాడు.

న్యూజిలాండ్‌తో జరగాల్సిన తొలి టెస్టుకు కేవలం మూడు రోజుల ముందు గాయపడటంతో తాను తీవ్రంగా నిరాశకు గురయ్యానని కాక్స్ చెప్పాడు. ఇక క్రికెట్ ఆడలేనేమోననే భయం కలిగిన సమయంలో కోహ్లీ చెప్పిన మాటలు తనలో మళ్లీ ధైర్యాన్ని నింపాయని గుర్తుచేసుకున్నాడు. మైదానంలో కోహ్లీ ఎంత దూకుడుగా ఉంటాడో, బయట అంతే వినయంగా, దయగా ఉంటాడని కాక్స్ ప్రశంసించాడు. మైదానంలో దూకుడును కొనసాగిస్తూనే, బయట అందరితో గౌరవంగా ఎలా మెలగాలో కోహ్లీని చూసి నేర్చుకున్నానని చెప్పాడు.