

ప్రముఖ నటుడు అమితాబ్ బచ్చన్ మరోసారి ‘కౌన్ బనేగా క్రోర్పతి’ సీజన్ 18తో ప్రేక్షకుల ముందుకు వచ్చారు. ఈ సీజన్లో మహారాష్ట్రకు చెందిన భూషణ్ ఠాక్రే రూ.కోటి గెలుచుకుని తొలి కోటీశ్వరుడిగా నిలిచారు. ఆయన సాధించిన ఈ ఘనతకు సంబంధించిన ప్రోమోను షో నిర్వాహకులు తాజాగా విడుదల చేశారు. ఈ సీజన్లో ఇప్పటికే పలువురు కంటెస్టెంట్లు కోటి రూపాయల ప్రశ్న వరకు చేరుకున్నప్పటికీ, ఆ ప్రశ్నకు సమాధానం చెప్పలేక పోటీ నుంచి తప్పుకున్నారు. అయితే, రూ.50 లక్షలు గెలుచుకుని కోటి రూపాయల ప్రశ్నను ఎదుర్కొన్న భూషణ్ ఠాక్రే.. 15వ ప్రశ్నకు సరైన సమాధానం ఇచ్చి రూ.కోటి సొంతం చేసుకున్నారు. దీంతో షోలో సంబరాలు మొదలయ్యాయి. భూషణ్ విజయంతో సంతోషించిన అమితాబ్ బచ్చన్ ఆయనను ఆప్యాయంగా హత్తుకుని అభినందించారు.
షోలో అమితాబ్తో మాట్లాడిన భూషణ్.. తాను యూపీఎస్సీ పరీక్షలకు సిద్ధమవుతున్నానని వెల్లడించారు. చదువుపై దృష్టి పెట్టేందుకు గత ఏడాదిన్నర కాలంగా కుటుంబానికి దూరంగా ఉంటున్నానని తెలిపారు. తన తండ్రి కూలీగా పనిచేస్తూ తన చదువుకు సహకరించారని గుర్తుచేసుకున్నారు. ఇప్పుడు తాను రూ.కోటి గెలుచుకున్న విషయం తెలిస్తే తండ్రి ఎంతో సంతోషిస్తారని, ఆయన కళ్లలో ఆనందాన్ని చూడాలని ఉందని భావోద్వేగంగా చెప్పారు. అనంతరం అమితాబ్ 16వ ప్రశ్న అడగబోతుండగా ప్రోమో ముగుస్తుంది. కాగా, అనారోగ్య కారణాలతో ఈ సీజన్కు కొంతకాలం విరామం తీసుకున్న అమితాబ్.. ఈ నెల 16న తిరిగి రావడంతో కేబీసీ సీజన్ 18 మళ్లీ ప్రారంభమైంది. ఈ కార్యక్రమం సోనీ ఎంటర్టైన్మెంట్ టెలివిజన్, సోనీ లివ్లో సోమవారం నుంచి శుక్రవారం వరకు రాత్రి 9 గంటలకు ప్రసారమవుతోంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!