ఉల్లిపాయల కొనుగోలుపై సీఎం విజయ్‌ను నిలదీసిన ఉదయనిధి

రేషన్‌ షాపుల ద్వారా ప్రజలకు పంపిణీ చేసేందుకు ఉల్లిపాయలు కొనుగోలు చేసిన వ్యవహారంలో రాష్ట్ర ప్రభుత్వం విఫలమైందంటూ శాసనసభ ప్రతిపక్ష నాయకుడు ఉదయనిధి స్టాలిన్‌ సీఎం విజయ్‌పై తీవ్ర విమర్శలు చేశారు. సోషల్‌ మీడియా వేదికగా స్పందించిన ఆయన, సహకార శాఖ ద్వారా ఉల్లిపాయల కొనుగోలులో ప్రభుత్వం తీవ్ర నిర్లక్ష్యం ప్రదర్శించిందని ఆరోపించారు. ఎమ్మెల్యేలను కొనుగోలు చేయడం తెలిసిన ‘డమ్మీ సీఎం’కి ఉల్లిపాయలు కొనడం తెలియదా? అంటూ వ్యంగ్యాస్త్రాలు సంధించారు. నేషనల్‌ అగ్రికల్చరల్‌ కోఆపరేటివ్‌ మార్కెటింగ్‌ ఫెడరేషన్‌ (NAFED) నుంచి ఎలాంటి ముందస్తు నాణ్యతా పరిశీలనలు చేయకుండానే 450 టన్నుల ఉల్లిపాయలను కొనుగోలు చేశారని మండిపడ్డారు. మహారాష్ట్ర నుంచి రైలులో వచ్చిన ఆ ఉల్లిపాయలు పూర్తిగా కుళ్లిపోయి, వినియోగానికి పనికిరాకుండా ఉన్నాయని ఆయన పేర్కొన్నారు.

ఈ వ్యవహారం బయటపడకుండా ఉండేందుకు అధికారులు కుళ్లిపోయిన ఉల్లిపాయలను కొరుక్కుపేటై రైల్వే టెర్మినల్‌లోనే వదిలేశారని ఉదయనిధి ఆరోపించారు. దుర్గంధం వ్యాపించడంతో ఆ ఉల్లిపాయలతో ప్రభుత్వానికి ఎలాంటి సంబంధం లేదని ప్రచారం చేశారని విమర్శించారు. కుళ్లిపోయిన ఉల్లిపాయల్లో కొంత భాగాన్ని లారీల్లో తిరుచ్చి గాంధీ మార్కెట్‌కు తరలించి విక్రయించేందుకు ప్రయత్నించారని, అయితే నాణ్యతను పరిశీలించకుండా కొనుగోలు చేయలేమని వ్యాపారులు నిరాకరించడంతో లారీ డ్రైవర్లు ఇబ్బందులు ఎదుర్కొన్నారని తెలిపారు. ఒకవైపు ఉల్లి ధరలు పెరిగి ప్రజలు ఇబ్బందులు పడుతుంటే, ప్రభుత్వం ప్రజా సంక్షేమాన్ని పట్టించుకోకుండా ఉప ఎన్నికల పనుల్లో నిమగ్నమైందని ఆయన విమర్శించారు. గతంలో రేషన్‌ షాపుల ద్వారా రూ.30కే పొన్ని బియ్యం అందిస్తామని ప్రకటించి, టెండర్లు నిర్వహించకుండా సాధారణ బియ్యాన్ని పాలిష్‌ చేసి విక్రయించారన్న ఆరోపణలను కూడా గుర్తుచేశారు. నాసిరకం ఉల్లిపాయల కొనుగోలుకు బాధ్యులెవరో, ఈ వ్యవహారాన్ని కప్పిపుచ్చేందుకు ప్రయత్నించిన వారెవరో సీఎం విజయ్‌ స్పష్టం చేయాలని ఉదయనిధి స్టాలిన్‌ డిమాండ్‌ చేశారు.