తిరుమల లడ్డూ కల్తీ కేసుపై సుప్రీంకోర్టు కీలక నిర్ణయం..

తిరుమల లడ్డూ కల్తీ వ్యవహారానికి సంబంధించిన కేసు విచారణను ఆంధ్రప్రదేశ్‌ వెలుపలకు బదిలీ చేయాలన్న పిటిషన్‌పై సుప్రీంకోర్టు కీలక నిర్ణయం తీసుకుంది. ప్రస్తుత దశలో విచారణను మరో రాష్ట్రానికి బదిలీ చేయాల్సిన అవసరం లేదని స్పష్టం చేసింది. విచారణను ఏపీ వెలుపలకు మార్చాలని కోరుతూ సీనియర్ న్యాయవాది సిద్ధార్థ్ దవే వాదనలు వినిపించారు. రాష్ట్రంలో కేసుకు సంబంధించి ప్రతికూల వాతావరణం ఉందని, ముఖ్యమంత్రి, ఉప ముఖ్యమంత్రి చేస్తున్న రాజకీయ వ్యాఖ్యలు విచారణపై ప్రభావం చూపే అవకాశం ఉందని ఆయన కోర్టు దృష్టికి తీసుకెళ్లారు.

ఈ వాదనలపై స్పందించిన ప్రధాన న్యాయమూర్తి జస్టిస్ సూర్యకాంత్, తమ ఉత్తర్వులతో ఇప్పటికే సంబంధిత వ్యక్తుల వ్యాఖ్యలకు అడ్డుకట్ట వేసినట్లు పేర్కొన్నారు. భవిష్యత్తులో ఏదైనా సమస్య తలెత్తితే మళ్లీ సుప్రీంకోర్టును ఆశ్రయించవచ్చని పిటిషనర్ తరఫు న్యాయవాదికి సూచించారు. ప్రస్తుత పరిస్థితుల్లో కేసు విచారణను మరో రాష్ట్రానికి బదిలీ చేయడానికి తగిన కారణాలు కనిపించడం లేదని ధర్మాసనం స్పష్టం చేసింది. దీంతో తిరుమల లడ్డూ కల్తీ కేసు విచారణను ఏపీ వెలుపలకు మార్చాలన్న అభ్యర్థనకు ప్రస్తుతానికి అవకాశం లేకుండా పోయింది.