కొత్తపట్నం బీచ్‌కు కొట్టుకొచ్చిన బోటు.. అందులో నాలుగు మృతదేహాలు!

ప్రకాశం జిల్లా కొత్తపట్నం బీచ్‌ వద్ద కలకలం రేగింది. సముద్రం నుంచి ఓ బోటు తీరానికి కొట్టుకొచ్చింది. స్థానికులు గమనించి పరిశీలించగా.. అందులో నాలుగు మృతదేహాలు ఉన్నట్లు గుర్తించారు. దీంతో ఈ ఘటనపై తీర ప్రాంతంలో ఆందోళన నెలకొంది. బోటు తీరానికి ఎలా చేరింది? అందులో ఉన్నవారికి ఏం జరిగింది? అనే విషయాలపై ఆసక్తి నెలకొంది.

స్థానికులకు అందిన సమాచారం ప్రకారం.. బోటులో సుమారు 15 మంది మత్స్యకారులు ఉన్నట్లు తెలుస్తోంది. ఈ బోటు చెన్నైకి చెందినదిగా అనుమానిస్తున్నారు. అయితే బోటు యజమాన్యం, మృతుల వివరాలు, మిగిలిన మత్స్యకారుల ఆచూకీపై ఇంకా స్పష్టత రావాల్సి ఉంది. ఘటనకు సంబంధించిన పూర్తి వివరాలు అధికారుల పరిశీలన అనంతరం వెల్లడయ్యే అవకాశం ఉంది.