కేసీఆర్‌పై బీజేపీ నేత రామ్‌ మాధవ్‌ సెటైర్లు

తెలంగాణలో ప్రధాన ప్రతిపక్షంగా చెప్పుకొంటున్న బీఆర్‌ఎస్‌ అధినేత, మాజీ ముఖ్యమంత్రి కేసీఆర్‌ రాజకీయంగా ఐరన్‌ లెగ్‌గా మారారని బీజేపీ జాతీయ ఉపాధ్యక్షుడు రామ్‌ మాధవ్‌ ఎద్దేవా చేశారు. హైదరాబాద్‌లోని బీజేపీ రాష్ట్ర కార్యాలయంలో గురువారం నిర్వహించిన విలేకరుల సమావేశంలో ఆయన మాట్లాడారు. గతంలో జాతీయ స్థాయిలో థర్డ్‌ ఫ్రంట్‌ ఏర్పాటు చేస్తానంటూ కేసీఆర్‌ దేశవ్యాప్తంగా పర్యటించి ఎవరినైతే కలిశారో, వారంతా ఎన్నికల్లో ఓటమి పాలయ్యారని విమర్శించారు. పశ్చిమ బెంగాల్‌ ముఖ్యమంత్రి మమతా బెనర్జీ, ఒడిశా మాజీ ముఖ్యమంత్రి నవీన్‌ పట్నాయక్‌, వైఎస్సార్‌సీపీ అధినేత వైఎస్‌ జగన్‌మోహన్‌రెడ్డి, చివరకు కేసీఆర్‌ కూడా ప్రజల చేతిలో ఓటమి చవిచూశారని వ్యాఖ్యానించారు. తెలంగాణలో కాంగ్రెస్‌కు తిరుగులేని ప్రత్యామ్నాయం బీజేపీయేనని పేర్కొన్నారు. కాంగ్రెస్‌ ప్రభుత్వ అవినీతి, తప్పిదాలు, పాలనా వైఫల్యాలను ప్రజల్లోకి తీసుకెళ్లి ఎండగడతామని తెలిపారు. కాంగ్రెస్‌ నేత రాహుల్‌ గాంధీ దేశ సమస్యలను పట్టించుకోకుండా ఎక్కువ సమయం అమెరికా, యూరప్‌ పర్యటనల్లో గడుపుతున్నారని ఆరోపించారు. మరోవైపు ముఖ్యమంత్రి రేవంత్‌ రెడ్డి రాష్ట్ర పాలనను గాలికి వదిలేసి ఢిల్లీ పర్యటనలకే పరిమితమవుతున్నారని విమర్శించారు.

బీజేపీయే ప్రత్యామ్నాయం: రామచంద్రరావు

కాంగ్రెస్‌, బీఆర్‌ఎస్‌ పార్టీలను వీడి పలువురు యువత బీజేపీలో చేరుతున్నారని ఆ పార్టీ తెలంగాణ రాష్ట్ర అధ్యక్షుడు ఎన్‌. రామచంద్రరావు తెలిపారు. ప్రజా వ్యతిరేక విధానాలు అవలంబిస్తున్న కాంగ్రెస్‌, బీఆర్‌ఎస్‌ పార్టీలకు ప్రత్యామ్నాయంగా ప్రజలు బీజేపీ వైపు చూస్తున్నారని ఆయన పేర్కొన్నారు. గురువారం పాతబస్తీకి చెందిన పలువురు నాయకులు, కార్యకర్తలు బీజేపీలో చేరినట్లు వెల్లడించారు.