

కాంగ్రెస్ ఎన్నికల మ్యానిఫెస్టో, ఆ పార్టీ ఇచ్చిన హామీలకు మూడేళ్లు పూర్తయినా ప్రజలకు ప్రయోజనం చేకూరలేదని బీఆర్ఎస్ నేత, మాజీ మంత్రి హరీశ్రావు విమర్శించారు. ఎన్నికల సమయంలో ఇచ్చిన హామీలను అమలు చేయడంలో ప్రభుత్వం విఫలమైందని ఆరోపించారు. కాంగ్రెస్ ప్రకటించిన ‘అభయ హస్తం’ ఇప్పుడు ‘శూన్య హస్తం’గా మారిందని ఎద్దేవా చేశారు. ఈ మేరకు ఆయన ‘ఎక్స్’ వేదికగా స్పందించారు. గాంధీభవన్ సాక్షిగా ప్రజలకు ఇచ్చిన మాటను ఎందుకు నిలబెట్టుకోలేదని ప్రశ్నించారు. ఏఐసీసీ అధ్యక్షుడు మల్లికార్జున ఖర్గే, సీఎం రేవంత్రెడ్డి, డిప్యూటీ సీఎం భట్టి విక్రమార్క, మంత్రి శ్రీధర్బాబు దీనిపై సమాధానం చెప్పాలని డిమాండ్ చేశారు.
తొలి కేబినెట్ సమావేశంలోనే ఆరు గ్యారంటీలకు చట్టబద్ధత కల్పిస్తామని ఇచ్చిన హామీ ఇప్పటికీ నెరవేరలేదని హరీశ్రావు ఆరోపించారు. ఇప్పటివరకు 38 కేబినెట్ సమావేశాలు జరిగినా ఆరు గ్యారంటీలకు చట్టబద్ధత ఎందుకు కల్పించలేదని ప్రశ్నించారు. మ్యానిఫెస్టో పేరుతో ప్రజలకు ఎన్నో హామీలు ఇచ్చి అధికారంలోకి వచ్చిన తర్వాత వాటి అమలును పట్టించుకోవడం లేదని విమర్శించారు. ఆరు గ్యారంటీలతో పాటు 420 హామీలను ఇచ్చి ప్రజలను మభ్యపెట్టారని ఆరోపించారు. కాంగ్రెస్ ప్రభుత్వ వైఖరిని తెలంగాణ ప్రజలు గుర్తించారని, రానున్న రోజుల్లో తగిన గుణపాఠం చెబుతారని హరీశ్రావు తన పోస్టులో పేర్కొన్నారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!