

డాక్టర్ బీఆర్ అంబేడ్కర్ కోనసీమ జిల్లాలో చోటుచేసుకున్న గ్యాస్ బ్లోఅవుట్ ఘటనపై ముఖ్యమంత్రి చంద్రబాబు నాయుడు అధికారులతో సమీక్ష నిర్వహించారు. గ్యాస్ లీకేజీ ప్రభావిత ప్రాంతాల్లోని ప్రజలను వెంటనే సురక్షిత ప్రాంతాలకు తరలించాలని ఆదేశించారు. ప్రజల భద్రతకు అత్యంత ప్రాధాన్యం ఇవ్వాలని, లీకేజీని అరికట్టేందుకు ఓఎన్జీసీ ప్రత్యేక సాంకేతిక బృందాలను రంగంలోకి దించి యుద్ధప్రాతిపదికన చర్యలు చేపట్టాలని సూచించారు. కిలోమీటరు పరిధిలోని నివాస ప్రాంతాల ప్రజలను ఇప్పటికే ఖాళీ చేయించినట్లు అధికారులు సీఎంకు తెలిపారు. ఇప్పటివరకు మంటలు చెలరేగలేదని, గ్యాస్ బావి ముఖద్వారం పటిష్ఠంగానే ఉందని ఓఎన్జీసీ అధికారులు వివరించారు. ఇటీవల ఇలాంటి ఘటనలు తరచూ చోటుచేసుకుంటున్న నేపథ్యంలో ఓఎన్జీసీ ఛైర్మన్తో పాటు ఉన్నతాధికారులతో మాట్లాడి భద్రతా చర్యలను సమీక్షించాలని చంద్రబాబు ఆదేశించారు.
మరోవైపు, కోనసీమ జిల్లాలో జరిగిన బ్లోఅవుట్ ఘటనపై ఉప ముఖ్యమంత్రి పవన్ కల్యాణ్ కూడా ఆరా తీశారు. ప్రమాద తీవ్రత, పరిసర గ్రామాల ప్రజల భద్రతకు తీసుకుంటున్న చర్యలపై జిల్లా కలెక్టర్ను వివరాలు అడిగి తెలుసుకున్నారు. మంగళవారం తెల్లవారుజామున 4.30 గంటల సమయంలో పెద్ద శబ్దంతో ఒక్కసారిగా గ్యాస్ వెలువడటం ప్రారంభమైందని కలెక్టర్ పవన్ కల్యాణ్కు వివరించారు. వెంటనే పరిసర ప్రాంతాల ప్రజలను సురక్షిత ప్రాంతాలకు తరలించాలని ఆయన ఆదేశించారు. వరుసగా బ్లోఅవుట్ ఘటనలు చోటుచేసుకుంటున్న నేపథ్యంలో భవిష్యత్తులో ఇలాంటి ప్రమాదాలు పునరావృతం కాకుండా సమగ్ర భద్రతా ఆడిట్ నిర్వహించాలని సూచించారు.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!