

అమెరికాకు చెందిన ప్రముఖ చిప్ల తయారీ సంస్థ ఎన్విడియా (Nvidia) షేర్లు ఇన్వెస్టర్లకు భారీ లాభాలు అందిస్తున్నాయి. ఈ సంస్థలో అమెరికా అధ్యక్షుడు డొనాల్డ్ ట్రంప్కు కూడా గణనీయమైన పెట్టుబడులు ఉన్నట్లు మీడియా కథనాలు వెల్లడిస్తున్నాయి. వాషింగ్టన్ పోస్ట్ కథనం ప్రకారం, గత రెండేళ్లలో ఎన్విడియాలో ట్రంప్ వాటాల విలువ గణనీయంగా పెరిగింది. 2024 చివరి నాటికి ఆయన వద్ద ఉన్న షేర్ల విలువ 6.15 లక్షల డాలర్ల నుంచి 13 లక్షల డాలర్ల మధ్య ఉండేది. ప్రస్తుతం ఆ వాటాల విలువ 1.3 కోట్ల డాలర్ల నుంచి 6.2 కోట్ల డాలర్ల మధ్య ఉండవచ్చని అంచనా. అయితే, ట్రంప్ ఇటీవల వెల్లడించిన ఆర్థిక వివరాల్లో చివరి రెండు నెలల లావాదేవీలు లేవు. దీంతో ఆయన వాటాల ప్రస్తుత కచ్చితమైన విలువపై స్పష్టత లేదు.
చైనాకు అధునాతన చిప్ల సరఫరా, ట్రంప్ కార్యవర్గంతో ఎన్విడియాకు ఉన్న సంబంధాలపై విమర్శలు వెల్లువెత్తుతున్న సమయంలో ఈ పెట్టుబడుల వివరాలు వెలుగులోకి వచ్చాయి. మరోవైపు, ఎన్విడియాతో పాటు కంప్యూటర్ చిప్ల తయారీ, కృత్రిమ మేధస్సు రంగాలకు చెందిన మరో రెండు డజన్ల సంస్థలను ‘నేషనల్ ఛాంపియన్స్’గా ప్రకటించేందుకు ట్రంప్ ప్రభుత్వం పరిశీలిస్తున్నట్లు వాల్ స్ట్రీట్ జర్నల్ కథనం పేర్కొంది. టెక్నాలజీ రంగంలోని కీలక సంస్థలకు గుర్తింపు కల్పించడమే ఈ ప్రతిపాదన ఉద్దేశంగా ఉన్నట్లు తెలుస్తోంది. ఎన్విడియా మంగళవారం తన త్రైమాసిక ఆర్థిక ఫలితాలను ప్రకటించనుంది. దీంతో కంపెనీ పనితీరుపై ఇన్వెస్టర్లు, మార్కెట్ వర్గాల్లో ఆసక్తి నెలకొంది.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!