ఇరాన్‌లో 8 రోజుల్లో 1,330 మందికి పైగా మృతి – ఐక్యరాజ్యసమితిలో ఇరాన్ ఆరోపణలు!

ఇరాన్‌పై అమెరికా, ఇజ్రాయెల్ కలిసి జరిపిన దాడుల్లో కేవలం ఎనిమిది రోజుల్లోనే 1,330 మందికి పైగా పౌరులు మరణించారని, అందులో సుమారు 300 మంది పిల్లలు ఉన్నారని ఐక్యరాజ్యసమితిలో ఇరాన్ రాయబారి వెల్లడించారు. ఈ దాడులు అకారణంగా జరిగాయని, పలు నగరాల్లో భారీ ప్రాణ నష్టం సంభవించిందని ఆయన పేర్కొన్నారు.

ఇరాన్ రెడ్ క్రెసెంట్ సమాచారం ప్రకారం ఈ దాడుల్లో 7,943 ఇళ్లు, 1,617 వాణిజ్య కేంద్రాలు, 32 ఆరోగ్య కేంద్రాలు, 65 పాఠశాలలు ధ్వంసమయ్యాయి. యుద్ధం ప్రారంభమైన మొదటి రోజైన ఫిబ్రవరి 28న ఇరాన్‌లోని ఒక పాఠశాలపై జరిగిన దాడిలో 165 మంది మరణించగా, అందులో ఎక్కువ మంది పాఠశాల బాలికలే ఉన్నారని అధికారులు తెలిపారు. ఇరాన్‌ను లొంగదీసుకోవడానికి ఒత్తిడి తేవడమే ఈ దాడుల లక్ష్యమని ఇరాన్ అధికారులు ఆరోపిస్తున్నారు.