వైసీపీపై ధూళిపాళ్ళ తీవ్ర ఆరోపణలు

టీడీపీ ఎమ్మెల్యే, సంగం డెయిరీ చైర్మన్ ధూళిపాళ్ళ వీరయ్య వైసీపీపై తీవ్ర స్థాయిలో విమర్శలు గుప్పించారు. తనపై రాజకీయ కక్షతో కేసులు పెట్టి 33 రోజులు జైలులో ఉంచినప్పటికీ ఏ తప్పూ నిరూపించలేకపోయారని ఆయన పేర్కొన్నారు. సంగం డెయిరీ సర్వర్లను హ్యాక్ చేయాలని ప్రయత్నించారని, తప్పుడు ప్రచారాలు వైసీపీ పేటెంట్ హక్కులని ఆరోపించారు. తిరుమల లడ్డూ నెయ్యి వివాదంపై మాట్లాడుతూ, గత ప్రభుత్వ కాలంలో నెయ్యిలో కల్తీ జరిగినట్లు ఎన్డీడీబీ పేర్కొన్న విషయాన్ని గుర్తుచేశారు. తక్కువ ధరలకు నెయ్యి సరఫరా ఎలా జరిగిందో వైసీపీ సమాధానం చెప్పాలని ప్రశ్నించారు.

సంగం డెయిరీ అన్ని సాంకేతిక, శాస్త్రీయ ప్రమాణాలను పాటించి టెండర్ సాధించిందని, ఇందులో ఎలాంటి రాజకీయ ప్రభావం లేదని స్పష్టం చేశారు. హెరిటేజ్ సంస్థ టీటీడీకి ఒక్క నెయ్యి సరఫరా చేయలేదని తెలిపారు. సంగం డెయిరీ గుంటూరు రైతులది, శ్రీజ డెయిరీ చిత్తూరు మహిళలది అని పేర్కొన్నారు. తిరుమల లడ్డూను అపవిత్రం చేసిన వారు స్వామి సన్నిధిలో తప్పించుకోలేరని హెచ్చరించారు. వైసీపీ నాయకులు తమ తప్పును ఒప్పుకుని బాధ్యత వహించాలని సవాల్ విసిరారు.