సీడబ్ల్యూసీ సమావేశం - ఓటర్ల జాబితాపై కాంగ్రెస్‌ ఐదు కీలక డిమాండ్లు

ఢిల్లీలో జరిగిన కాంగ్రెస్‌ వర్కింగ్‌ కమిటీ (సీడబ్ల్యూసీ) సమావేశం నేపథ్యంలో ఓటర్ల జాబితా, ఎన్నికల ప్రక్రియలో పారదర్శకతపై కాంగ్రెస్‌ ఐదు కీలక డిమాండ్లను ముందుకు తెచ్చింది. ఓటర్ల జాబితాలో జరిగే ప్రతి ప్రధాన మార్పుకు సంబంధించిన పూర్తి సమాచారాన్ని బహిరంగంగా వెల్లడించాలని, తొలగించిన ఓటర్లకు వారి పేర్లు ఎందుకు తొలగించారో పూర్తి వివరాలు అందించి అప్పీల్‌ చేసుకునే అవకాశం కల్పించాలని పార్టీ కోరింది. అలాగే రాజకీయ పార్టీలకు ఓటర్ల జాబితా, సంబంధిత సమాచారాన్ని సులభంగా అర్థమయ్యే రూపంలో సకాలంలో అందించాలని డిమాండ్‌ చేసింది.

ఓటర్ల జాబితాలో తీవ్రమైన అవకతవకలకు సంబంధించిన ఆధారాలు వెలుగులోకి వస్తే స్వతంత్రంగా, నిర్ణీత కాలపరిమితిలో దర్యాప్తు చేపట్టాలని కాంగ్రెస్‌ కోరింది. ఎన్నికల ప్రక్రియకు సంబంధించిన కీలక సమాచారం, నిర్ణయాలు పూర్తిగా పారదర్శకంగా ఉండాలని, సమాచారాన్ని దాచిపెడుతున్నారనే ఆరోపణలకు అవకాశం లేకుండా వ్యవస్థ పనిచేయాలని పేర్కొంది. మరోవైపు, ఓటర్ల తొలగింపును నిరోధించేందుకు ముందస్తు సమాచారం, బూత్‌ స్థాయి అధికారుల సందర్శనలు, క్లెయిమ్స్‌-అభ్యంతరాల ప్రక్రియ, అప్పీల్‌ అవకాశాలు వంటి రక్షణ చర్యలు అమల్లో ఉన్నాయని ఎన్నికల సంఘం తెలిపింది.