రైల్వే ప్రయాణికులకు కీలక అప్‌డేట్

రైలు ప్రయాణికులకు అందుబాటులో ఉన్న RAC (రిజర్వేషన్ ఎగైనెస్ట్ క్యాన్సిలేషన్) విధానాన్ని రద్దు చేసే అంశాన్ని భారతీయ రైల్వే పరిశీలిస్తున్నట్లు పలు మీడియా కథనాలు వెల్లడించాయి. ప్రస్తుతం RAC టికెట్‌పై ఇద్దరు ప్రయాణికులకు ఒకే సైడ్ లోయర్ బెర్త్‌ను కేటాయిస్తున్నారు. అయితే ఇద్దరి నుంచి పూర్తి టికెట్ ఛార్జీ వసూలు చేస్తుండటంపై అభ్యంతరాలు వ్యక్తమవుతున్నాయి. సగం బెర్త్ మాత్రమే పొందుతున్న ప్రయాణికుల నుంచి పూర్తి ధర వసూలు చేయడం సమంజసమేనా అనే ప్రశ్నలు తలెత్తుతున్నాయి.

RAC టికెట్లపై పూర్తి ఛార్జీలు వసూలు చేయడాన్ని పార్లమెంటరీ పబ్లిక్ అకౌంట్స్ కమిటీ (PAC) గతంలో తప్పుబట్టింది. 2026 ఫిబ్రవరిలో పార్లమెంటులో ప్రవేశపెట్టిన నివేదికలో, చార్ట్ సిద్ధమైన తర్వాత కూడా RAC స్థితిలో ఉండి పూర్తి బెర్త్ పొందని ప్రయాణికులకు టికెట్ ఛార్జీలో కొంత మొత్తాన్ని తిరిగి చెల్లించే విధానాన్ని పరిశీలించాలని సూచించింది. గతంలో బెర్తుల కేటాయింపును సమర్థంగా నిర్వహించేందుకు RAC విధానాన్ని ప్రవేశపెట్టగా, ప్రస్తుతం ఒకే బెర్త్‌ను ఇద్దరు పంచుకోవాల్సి రావడం వల్ల ప్రయాణికులకు, ముఖ్యంగా రాత్రి ప్రయాణాల్లో, అసౌకర్యం కలుగుతోంది. ఈ నేపథ్యంలో RAC కొనసాగింపుపై లేదా ప్రత్యామ్నాయ ఏర్పాట్లపై రైల్వే శాఖ పరిశీలన చేస్తున్నట్లు సమాచారం.