సోనియా గాంధీ ప్రధాని పదవిని వద్దనుకోవడానికి అసలు కారణం ఇదేనా?

2004 లోక్‌సభ ఎన్నికల్లో యూపీఏ విజయం సాధించిన తర్వాత సోనియా గాంధీ ప్రధానమంత్రి పదవిని తిరస్కరించడం మరోసారి రాజకీయ చర్చకు దారితీసింది. తన జ్ఞాపకాల పుస్తకం ‘బిలోంగింగ్: ఎ జర్నీ ఆఫ్ లవ్’లో ఈ నిర్ణయానికి గల కారణాన్ని సోనియా వివరించారు. తన ఇటాలియన్ మూలాలను బీజేపీ ప్రధాన రాజకీయ అంశంగా మార్చే అవకాశం ఉందని, దాంతో అభివృద్ధి, పాలన వంటి కీలక అంశాలు పక్కకు వెళ్లిపోతాయని భావించి ప్రధాని పదవికి దూరంగా ఉన్నట్లు ఆమె పేర్కొన్నారు.

అయితే ఈ పరిణామాలపై జేడీయూ జాతీయ కార్యనిర్వాహక అధ్యక్షుడు సంజయ్ ఝా భిన్నమైన వాదనను తెరపైకి తెచ్చారు. సోనియా గాంధీ ప్రధానమంత్రి అయ్యేందుకు అవసరమైన ఏర్పాట్లు పూర్తయ్యాయని, అయితే ములాయం సింగ్ యాదవ్ రాజకీయ సమీకరణాలను మార్చడంతో ఆమె నియామకానికి అడ్డంకి ఏర్పడిందని ఆయన మీడియాతో మాట్లాడుతూ పేర్కొన్నారు. 2004 ఎన్నికల తర్వాత చోటుచేసుకున్న రాజకీయ పరిణామాలపై ఈ రెండు భిన్నమైన వాదనలు మరోసారి ఆసక్తిని పెంచాయి. రెండు దశాబ్దాలు గడిచినా సోనియా గాంధీ ప్రధాని పదవిని తిరస్కరించడానికి గల కారణాలపై చర్చ కొనసాగుతోంది.