తెలంగాణ పెట్టుబడులకు గ్లోబల్ వేదికగా భారత్ సమ్మిట్: రేవంత్ రెడ్డి

తెలంగాణలో పెట్టుబడులకు అనుకూలమైన వాతావరణం ఉందని ప్రపంచానికి చాటిచెప్పడమే భారత్ సమ్మిట్ నిర్వహణ ప్రధాన ఉద్దేశమని ముఖ్యమంత్రి రేవంత్ రెడ్డి తెలిపారు. నవంబర్ 13, 14 తేదీల్లో జరుగుతున్న ఈ సదస్సుకు 70 దేశాల నుంచి సుమారు వెయ్యి మంది ప్రతినిధులు హాజరవుతున్నారని చెప్పారు. డిసెంబర్ 7 నుంచి 9 వరకు ఇన్వెస్ట్ తెలంగాణ గ్లోబల్ సమ్మిట్ నిర్వహించనున్నట్లు వెల్లడించారు. ఇందులో భాగంగా ఢిల్లీతో పాటు పలు ప్రాంతాల్లో కర్టెన్ రైజర్ కార్యక్రమాలు నిర్వహించామని, ముంబై, అహ్మదాబాద్‌లోనూ నిర్వహించనున్నట్లు తెలిపారు. తెలంగాణలో పెట్టుబడులు ఆకర్షించి, 2034 నాటికి ట్రిలియన్ డాలర్ల ఆర్థిక వ్యవస్థగా, 2047 నాటికి మూడు ట్రిలియన్ డాలర్ల ఆర్థిక వ్యవస్థగా రాష్ట్రాన్ని తీర్చిదిద్దడమే లక్ష్యమన్నారు. భారత్ సమ్మిట్‌కు ఆహ్వానించిన కొందరికి తొలుత అనుమతులు ఇచ్చిన కేంద్రం, ఆ తర్వాత నిరాకరించిందని ఆరోపించారు. తెలంగాణ ప్రయోజనాల కోసం ప్రభుత్వం తీసుకుంటున్న నిర్ణయాలను బీజేపీ, బీఆర్ఎస్ వ్యతిరేకిస్తున్నాయని విమర్శించారు.

కిషన్ రెడ్డి, రాంచందర్ రావు, కేటీఆర్ ప్రజలను తప్పుదోవ పట్టించే ప్రయత్నం చేస్తున్నారని సీఎం ఆరోపించారు. మూసీ ప్రక్షాళన, మెట్రో విస్తరణ, రీజినల్ రింగ్ రోడ్డు, తుమ్మిడిహట్టి వంటి ప్రాజెక్టులను కూడా రాజకీయ కారణాలతో వ్యతిరేకిస్తున్నారని అన్నారు. గిగ్ వర్కర్ల సంక్షేమం కోసం రాష్ట్ర ప్రభుత్వం తీసుకొచ్చిన చట్టాన్ని మరుసటి రోజు నుంచి అమలు చేయనున్నట్లు, రాహుల్ గాంధీ చేతుల మీదుగా గిగ్ వర్కర్స్ పాలసీని ప్రారంభించనున్నట్లు వెల్లడించారు. భారత్ సమ్మిట్ ముగింపు కార్యక్రమంలో సందేశం ఇచ్చేందుకు రాహుల్ గాంధీ హైదరాబాద్‌కు వస్తున్నారని తెలిపారు. రాహుల్ పర్యటనను బీజేపీ వ్యతిరేకించడంపై అభ్యంతరం వ్యక్తం చేసిన రేవంత్ రెడ్డి, ప్రజాస్వామ్యంలో భిన్నాభిప్రాయాలకు చోటు ఉండాలని పేర్కొన్నారు. ప్రపంచ శాంతి, తెలంగాణ అభివృద్ధి, పెట్టుబడుల అవకాశాలపై చర్చించేందుకు ఈ సదస్సు ఉపయోగపడుతుందని, ఇందులో పాల్గొనే అతిథులు తెలంగాణకు బ్రాండ్ అంబాసిడర్లుగా మారుతారని ఆశాభావం వ్యక్తం చేశారు.