జిల్లాల పునర్విభజనపై వివాదం.. పేర్లు, సరిహద్దులపై ప్రజల్లో అసంతృప్తి

ఆంధ్రప్రదేశ్‌లో ఇటీవల చేపట్టిన జిల్లాల పునర్విభజనపై తీవ్ర వివాదం చెలరేగుతోంది. అన్నమయ్య జిల్లా కేంద్రాన్ని రాయచోటి నుంచి మదనపల్లెకు మార్చడమే కాకుండా, కొత్తగా అడ్డరోడ్డు జంక్షన్, అద్దంకి, పీలేరు, మడకశిర, బనగానపల్లె వంటి రెవెన్యూ డివిజన్లను ఏర్పాటు చేయడంపై ప్రజల్లో అసంతృప్తి వ్యక్తమవుతోంది. గత ప్రభుత్వం రాజంపేట పార్లమెంటు నియోజకవర్గాన్ని కేంద్రంగా చేసుకుని అన్నమయ్య జిల్లాను ఏర్పాటు చేయగా, ప్రస్తుత ప్రభుత్వం ఆ జిల్లాను రద్దు చేసి మూడు జిల్లాలుగా విభజించిందన్న విమర్శలు వెల్లువెత్తుతున్నాయి.

ప్రాథమిక నోటిఫికేషన్‌లో తంబళ్లపల్లె, పీలేరు, మదనపల్లె నియోజకవర్గాలను చిత్తూరు జిల్లాలోని పుంగనూరు నియోజకవర్గంతో కలిపి మదనపల్లె జిల్లా ఏర్పాటు చేస్తున్నట్లు ప్రకటించారు. అయితే తుది నోటిఫికేషన్ నాటికి రాయచోటిని మదనపల్లె జిల్లాలోకి, రాజంపేటను వైఎస్సార్ కడప జిల్లాలోకి, రైల్వేకోడూరు నియోజకవర్గాన్ని తిరుపతి జిల్లాలోకి చేర్చడంతో జిల్లాకు స్పష్టమైన రూపురేఖలు లేకుండా పోయాయన్న విమర్శలు వినిపిస్తున్నాయి.

అన్నమయ్య స్వస్థలం అయిన తాళ్లపాక రాజంపేట నియోజకవర్గంలో ఉండగా, ఆ ప్రాంతాన్ని అన్నమయ్య జిల్లా నుంచి వేరు చేసి వైఎస్సార్ కడప జిల్లాలో కలిపారు. అయితే ఆయన పేరును సంబంధం లేని మదనపల్లె జిల్లాకు పెట్టడం సరికాదన్న వాదన బలంగా వినిపిస్తోంది.

అదేవిధంగా, పోలవరంతో ప్రత్యక్ష సంబంధం లేని రంపచోడవరం కేంద్రంగా కొత్త జిల్లాను ఏర్పాటు చేసి దానికి పోలవరం పేరు పెట్టడంపై కూడా సందేహాలు వ్యక్తమవుతున్నాయి. అసలు పోలవరం ఏలూరు జిల్లాలో ఉండగా, రాజకీయ ప్రయోజనాల కోసమే ఈ పేరు మార్పు జరిగిందని ఆరోపణలు వస్తున్నాయి. దీంతో రంపచోడవరం పేరు మసకబారే ప్రమాదం ఉందని స్థానికులు ఆందోళన వ్యక్తం చేస్తున్నారు.

ఇక బాపట్ల జిల్లాలోని అద్దంకి నియోజకవర్గాన్ని ప్రకాశం జిల్లాలో కలపడం వల్ల బాపట్ల జిల్లా ప్రాధాన్యం తగ్గిందన్న విమర్శలు ఉన్నాయి. అలాగే మార్కాపురం, కనిగిరి, ఎర్రగొండపాలెం, గిద్దలూరు నియోజకవర్గాలతో కొత్త జిల్లా ఏర్పాటు చేసినప్పటికీ అది ప్రజల ఆకాంక్షలకు అనుగుణంగా లేదని స్థానిక వర్గాలు అంటున్నాయి.

2023లో పార్లమెంటు నియోజకవర్గాలను ఆధారంగా చేసుకుని శాస్త్రీయ పద్ధతిలో జిల్లాలను ఏర్పాటు చేసినప్పటికీ, ఇప్పుడు వాటిని అస్తవ్యస్తంగా మార్చడం వెనుక రాజకీయ ప్రయోజనాలే కారణమన్న ఆరోపణలు బలపడుతున్నాయి. రాజకీయంగా బలహీనంగా ఉన్న ప్రాంతాలను దెబ్బతీసేలా మార్పులు చేసి, తమకు అనుకూలమైన జిల్లాలను మాత్రం మార్పులు చేయకుండా అలాగే ఉంచారన్న విమర్శలు రాజకీయ వర్గాల్లో వెల్లువెత్తుతున్నాయి.