కాంగ్రెస్‌ సీఎంలు రాజీనామా చేసి బ్యాలెట్‌ ఎన్నికలకు రావాలి - బండి సంజయ్‌

కాంగ్రెస్‌ పార్టీకి ధైర్యం ఉంటే హిమాచల్‌ప్రదేశ్, కర్ణాటక, తెలంగాణ, కేరళ రాష్ట్రాల ముఖ్యమంత్రులతో రాజీనామా చేయించి, ప్రభుత్వాలను రద్దు చేసి బ్యాలెట్‌ పేపర్లతో మళ్లీ ఎన్నికలకు రావాలని కేంద్ర హోంశాఖ సహాయ మంత్రి బండి సంజయ్‌ సవాల్‌ చేశారు. శనివారం భాజపా రాష్ట్ర కార్యాలయంలో మాట్లాడిన ఆయన.. ఆయా రాష్ట్రాల్లో కాంగ్రెస్‌ విజయం సాధించడానికి ఈవీఎంలే కారణమైతే, సీఎంలు రాజీనామా చేసి బ్యాలెట్‌ ఎన్నికలను ఎదుర్కొనేందుకు సిద్ధంగా ఉన్నారా అని ప్రశ్నించారు. ఈవీఎంలు, ఎస్‌ఐఆర్‌పై పదేపదే విమర్శలు చేస్తున్న కాంగ్రెస్‌ నేతలు తన సవాల్‌ను స్వీకరించాలని అన్నారు. సీఈసీ జ్ఞానేశ్‌కుమార్‌కు భాజపాతో ఎలాంటి సంబంధం లేదని స్పష్టం చేశారు.

ఇండీ కూటమికి ప్రజాదరణ లేదని, ముంబయి, దిల్లీలో నిర్వహించిన ఆందోళనలకు పెద్దగా ప్రజలు హాజరు కాకపోవడమే ఇందుకు నిదర్శనమని బండి సంజయ్‌ అన్నారు. ప్రపంచవ్యాప్తంగా కెప్టెన్‌ స్మిత్‌ మచ్చర్‌ ధైర్యసాహసాలను ప్రశంసిస్తుంటే రాహుల్‌గాంధీ, కాంగ్రెస్‌ నేతలు కనీసం స్పందించకపోవడం దారుణమని వ్యాఖ్యానించారు. దిల్‌సుఖ్‌నగర్‌లోని సంతోషీమాత ఆలయంలో జరిగిన దాడిని ఆయన తీవ్రంగా ఖండించారు. హిందూ దేవాలయాలపై దాడులు జరుగుతున్నా ప్రభుత్వం పట్టించుకోవడం లేదని ఆరోపించారు. నిందితులపై కఠిన చర్యలు తీసుకుంటే ఇలాంటి ఘటనలకు అడ్డుకట్ట వేయవచ్చని పేర్కొన్నారు.