టీవీకే అధినేత విజయ్‌కు మరోసారి సీబీఐ నోటీసులు..

టీవీకే అధినేత విజయ్‌కు సీబీఐ మరోసారి నోటీసులు జారీ చేసింది. ఈ నెల 19 న మళ్లీ విచారణకు హాజరుకావాలని ఆ నోటీసుల్లో స్పష్టంగా పేర్కొంది. ఈ కేసులో భాగంగా నిన్న ఢిల్లీలోని సీబీఐ ప్రధాన కార్యాలయంలో అధికారులు విజయ్‌ను సుమారు 7 గంటల పాటు విచారించారు. ఆ విచారణ అనంతరం మరింత వివరాలు తెలుసుకునేందుకు మరోసారి పిలవాలని సీబీఐ నిర్ణయించినట్లు సమాచారం.

గత ఏడాది సెప్టెంబర్ 27న కరూర్‌లో జరిగిన టీవీకే పార్టీ బహిరంగ సభలో తొక్కిసలాట జరిగింది. ఈ ఘటనలో 41 మంది ప్రాణాలు కోల్పోగా, 100 మందికి పైగా గాయపడ్డారు. ఈ ఘటనపై సుప్రీంకోర్టు ఆదేశాల మేరకు సీబీఐ దర్యాప్తు కొనసాగిస్తోంది. ఈ నేపథ్యంలోనే విజయ్‌ను ప్రశ్నించినట్లు తెలుస్తోంది.

సీబీఐ విచారణలో కరూర్ తొక్కిసలాట ఘటనకు పార్టీకి ఎలాంటి సంబంధం లేదని విజయ్ చెప్పినట్లుగా సమాచారం. పోలీసుల వైఫల్యం వల్లే ఈ దుర్ఘటన జరిగిందని, పరిస్థితి అదుపు తప్పడంతో తాను అక్కడి నుంచి వెంటనే వెళ్లిపోయానని ఆయన వెల్లడించినట్లు వార్తలు వస్తున్నాయి. అలాగే తన రాజకీయ ఎదుగుదలను సహించలేక డీఎంకే ప్రభుత్వం తనపై తప్పుడు ఆరోపణలు చేస్తోందని కూడా విజయ్ విచారణలో పేర్కొన్నట్లు తెలుస్తోంది.