ఓటీటీలో శంబాల కొత్త రికార్డ్...

యంగ్ హీరో ఆది సాయికుమార్ నటించిన సినిమా ‘శంబాల’ ఓటీటీలో సరికొత్త రికార్డు సృష్టించింది. థియేటర్లలో మంచి విజయం సాధించిన ఈ చిత్రం, ఇప్పుడు డిజిటల్ ప్లాట్‌ఫామ్‌లోనూ భారీ ఆదరణ పొందుతోంది. ప్రముఖ ఓటీటీ ప్లాట్‌ఫామ్ ‘ఆహా’లో స్ట్రీమింగ్ అవుతున్న ఈ సినిమా కేవలం 11 రోజుల్లోనే 100 మిలియన్ స్ట్రీమింగ్ నిమిషాలు పూర్తి చేసి సంచలనం సృష్టించింది.

యుగంధర్ ముని దర్శకత్వంలో తెరకెక్కిన ‘శంబాల’ గతేడాది డిసెంబర్ 25 న థియేటర్లలో విడుదల అయింది. అక్కడ ప్రేక్షకుల నుంచి మంచి స్పందన లభించిన తర్వాత, గత నెల 21 న ఆహా ఓటీటీలో విడుదల అయ్యింది. విడుదలైన మొదటి రోజునుంచే సినిమా విశేష ఆదరణ పొందుతూ ఈ కీలక మైలురాయిని చేరుకుంది. ఈ సందర్భంగా ఆహా సంస్థ తమ సోషల్ మీడియా వేదిక ఎక్స్ లో ప్రత్యేక పోస్టర్ విడుదల చేసి ఈ విషయాన్ని అధికారికంగా ప్రకటించింది.

ఈ విజయంతో ‘శంబాల’ థియేటర్లలోనే కాకుండా ఓటీటీలో కూడా బ్లాక్‌బస్టర్ హిట్‌గా నిలిచింది. ప్రస్తుతం ఈ సినిమా తెలుగులో మాత్రమే అందుబాటులో ఉంది. త్వరలో హిందీ వెర్షన్ విడుదలకు సిద్ధమవుతున్నట్లు సమాచారం. హిందీ వెర్షన్ అమెజాన్ ప్రైమ్‌లో విడుదల కావొచ్చని ప్రచారం సాగుతున్నప్పటికీ, దీనిపై ఇంకా అధికారిక ప్రకటన రావాల్సి ఉంది.