ఆకాశంలో ఉత్కంఠ భరితం: విమానం తోకకు చిక్కిన పారాచూట్‌తో వేలాడిన స్కైడైవర్!

ఆస్ట్రేలియాలోని క్వీన్స్‌లాండ్ రాష్ట్రం టల్లీ విమానాశ్రయ పరిధిలో ఒక భయానక ఘటన జరిగింది. స్కైడైవింగ్‌కు సిద్ధమైన ఆడ్రియన్ ఫెర్గూసన్ అనే వ్యక్తి 15,000 అడుగుల ఎత్తు నుంచి దూకే సమయంలో అతని పారాచూట్ విమానం తోక భాగంలో చిక్కుకుంది. దాంతో అతను గాల్లోనే కొంతసేపు వేలాడుతూ ప్రాణాలు పణంగా పెట్టాడు.

ఈ సంఘటన రెండు నెలల క్రితం జరిగినా, దాని వీడియోను అధికారులు తాజాగా విడుదల చేయడంతో అది సోషల్ మీడియాలో వైరల్ అవుతోంది. ఆ సమయంలో విమానంలో 17 మంది ఉన్నారు. వారిలో 16 మంది స్కైడైవర్లు ఒకేసారి జంప్ చేసి "16-వే ఫార్మేషన్" చేయాలని నిర్ణయించుకున్నారు. కానీ ఫెర్గూసన్‌కి మాత్రం దురదృష్టవశాత్తు పారాచూట్‌ విమానం తోకలో చిక్కుకుంది. ఆపదలో కూడా ధైర్యం కోల్పోకుండా అతను తన వద్ద ఉన్న కత్తితో చిక్కుకున్న భాగాన్ని కోసి, రిజర్వ్ పారాచూట్ సాయంతో సురక్షితంగా కిందికి దూకాడు. అతనికి కాళ్లకు స్వల్ప గాయాలు మాత్రమే అయ్యాయి.

ప్రమాద సమయంలో ‘మేడే కాల్‌’ చేసిన పైలట్‌ అవసరమైతే ఎమర్జెన్సీ పారాచూట్‌ ధరించేందుకు సిద్ధపడ్డారు. విమానంపై నియంత్రణ ఉన్నందున ఆ అవసరం లేదని బ్రిస్బేన్‌ ఎయిర్‌ ట్రాఫిక్‌ అధికారులు చెప్పడంతో టల్లీలో విమానాన్ని సురక్షితంగా కిందికి దించారు. ఒళ్లు గగుర్పాటు కలిగించే ఈ వీడియోతోపాటు ఘటనకు సంబంధించిన దర్యాప్తు నివేదికను ఆస్ట్రేలియన్‌ ట్రాన్స్‌పోర్ట్‌ సేఫ్టీ బ్యూరో విడుదల చేసింది.