గాన కోకిల సుమన్ కళ్యాణ్‌పూర్ కన్నుమూత

హిందీ, మరాఠీ చిత్రసీమల్లో తన మధుర గానంతో కోట్లాది సంగీతాభిమానులను అలరించిన ప్రముఖ నేపథ్య గాయని సుమన్ కళ్యాణ్‌పూర్ కన్నుమూశారు. 89 ఏళ్ల వయసులో ముంబైలోని తన నివాసంలో వయోభార సంబంధిత ఆరోగ్య సమస్యలతో ఆమె తుదిశ్వాస విడిచారు. 1937 జనవరి 28న ఢాకాలో జన్మించిన ఆమె, 1950లలో గాన ప్రస్థానం ప్రారంభించి భారతీయ సంగీత రంగంలో ప్రత్యేక గుర్తింపు పొందారు.

మూడు దశాబ్దాలకు పైగా సాగిన తన సంగీత ప్రయాణంలో ఆమె వందలాది చిరస్మరణీయ గీతాలను ఆలపించారు. మహమ్మద్ రఫీతో కలిసి పాడిన అనేక గీతాలు విశేష ఆదరణ పొందాయి. భారతీయ సంగీతానికి చేసిన సేవలకు గుర్తింపుగా 2023లో పద్మభూషణ్ పురస్కారంతో ఆమెను సత్కరించారు. ఆమె మరణంతో సంగీత, సినీ రంగాలకు చెందిన ప్రముఖులు, అభిమానులు తీవ్ర సంతాపం వ్యక్తం చేస్తున్నారు.