కెనడాలో గణేశ్ ఆలయం నుంచి హుండీ దోపిడీ

కెనడాలోని ఒంటారియో ప్రావిన్స్‌లోని బ్రాంప్టన్ గణేశ్ ఆలయంలో దారుణ దోపిడీ జరిగింది. పట్ట పగలు ముసుగుదారి దొంగ ఆలయం హుండీని ఎత్తుకుని పారిపోయాడు. ఈ ఘటనకు సంబంధించిన సీసీటీవీ వీడియో వైరల్ అవుతోంది.

వీడియోలో, అలారం మోగుతుండగా, ఎరుపు లైట్లు ఫ్లాష్ అవుతుండగా కూడా దొంగ హుండీని చేతిలో పట్టుకుని ఆలయం బయటకు ప్రశాంతంగా నడుచుకుంటూ వెళ్లడం కనిపిస్తోంది. ఆ సమయంలో ఆలయంలో పూజారి మరియు నలుగురు భక్తులు ఉన్నప్పటికీ, తీవ్ర షాక్‌కు గురై ఎవ్వరూ అతన్ని ఆపలేకపోయారు.

హుండీని ఎత్తుకొని పోతున్న దొంగను పూజారి కేవలం చూస్తూ ఉండగా, భక్తులు కూడా షాక్‌తో స్థంభించిపోయారు. వారిలో ఎవ్వరూ ముందుకు వచ్చి అడ్డుకోలేకపోయారు.

ఈ సంఘటన వీడియో సోషల్ మీడియాలో పలు ప్రతిక్రియలకు దారితీసింది. చాలామంది నెటిజన్లు ఆశ్చర్యం, అసహనం వ్యక్తం చేస్తూ ఎమోజీలతో స్పందించారు. ఈ ఘటన స్థానిక ఆలయాల భద్రతపై ప్రశ్నలు లేవనెత్తుతోంది.