ఐబొమ్మ మీద భారీ చర్య ... ₹22,400 కోట్ల నష్టం, లక్షల మంది డేటా రిస్క్!

భారతీయ సినిమా రంగాన్ని ఎన్నేళ్లుగా వేధిస్తున్న పైరసీకి గట్టి ఎదురుదెబ్బ పడింది. ఐబొమ్మ, బప్పం ప్లాట్‌ఫామ్ వ్యవస్థాపకుడు ఇమ్మడి రవిని అరెస్ట్ చేయడంతో టాలీవుడ్‌కు పెద్ద ఊరటనిచ్చింది. కొన్ని గంటల్లోనే కొత్తగా విడుదలైన తెలుగు, తమిళం, మలయాళం సినిమాలు, OTT కంటెంట్‌ను లీక్ చేస్తూ ఐబొమ్మ ఒక వ్యవస్థీకృత పైరసీ నెట్‌వర్క్‌గా దేశవ్యాప్తంగా పెరిగింది.

ఈ నెట్‌వర్క్‌ కార్యకలాపాలు హైదరాబాద్, దుబాయ్, నెదర్లాండ్స్ మరియు మయన్మార్ వరకూ విస్తరించడంతో పోలీసులకు దొరకకుండా చాకచక్యంగా పని చేసింది. ఈ పైరసీ వల్ల 2023 లో భారత సినిమా పరిశ్రమకు సుమారు ₹22,400 కోట్ల నష్టం, 2024లో టాలీవుడ్‌కు మాత్రమే ₹3,700 కోట్ల నష్టం జరిగినట్లు అంచనా.

TFCC మరియు హైదరాబాద్ సైబర్ క్రైమ్ పోలీసులు నెలల తరబడి చేసిన ట్రాకింగ్‌లో భాగంగా ఐబొమ్మ కి సంబంధించిన 65 మిర్రర్ సైట్లను గుర్తించారు. చివరకు ఫ్రాన్స్ నుంచి హైదరాబాద్‌కు వచ్చిన ఇమ్మడి రవిని ఎయిర్‌పోర్ట్‌లో అరెస్ట్ చేయడం కీలక మలుపైంది. ఆ తర్వాత చిరంజీవి, నాగార్జున, ఎస్‌.ఎస్‌.రాజమౌళి, దిల్‌రాజు వంటి ప్రముఖులు సీపీ సజ్జనార్‌ను కలిసి కృతజ్ఞతలు తెలిపారు.

దర్యాప్తు సమయంలో షాకింగ్ విషయాలు బయటపడ్డాయి. రవికి చెందిన హార్డ్‌డిస్క్‌లో 21,000 పైరసీ సినిమాలు, దాదాపు 50 లక్షల యూజర్ల వివరాలు, పలు ఎలక్ట్రానిక్ పరికరాలు, చెక్ బుక్స్, డెబిట్ కార్డులు లభించాయి. అలాగే అతని బ్యాంకు ఖాతాల్లో ఉన్న ₹3 కోట్లకు పైగా మొత్తాన్ని అధికారులు ఫ్రీజ్ చేశారు. పైరసీ ద్వారా “వందల కోట్లు సంపాదించాను” అని రవి విచారణలో ఒప్పుకున్నట్లు సమాచారం. 65 కి పైగా మిర్రర్‌ సైట్లను బ్లాక్ చేయడంతో ఈ పైరసీ నెట్‌వర్క్‌పై భారీ దెబ్బ పడింది. నిర్మాతల అంచనా ప్రకారం మొత్తం నష్టం ₹24,000 కోట్లకు చేరింది.

ఇప్పుడు రవికిచెందిన యూజర్ డేటా బేస్ దర్యాప్తులో కీలకం. ఆ డేటా ఎలా సేకరించబడింది? ఎవరికి పంపబడింది? ఎక్కడ ఉపయోగించబడింది? అన్న విషయాలను సైబర్ టీంలు విశ్లేషిస్తున్నాయి. అక్రమ సైట్లలో తమ డేటా సేవ్ అయిన యూజర్లు స్పామ్, స్కామ్‌లు, మాల్వేర్ దాడులు, ఫైనాన్స్ ఫ్రాడ్ వంటి ప్రమాదాలకు గురయ్యే అవకాశం ఉంది.

ఈ కేసు ద్వారా ఒక విషయం స్పష్టమైంది పైరసీ సినిమా రంగానికే కాకుండా సాధారణ వినియోగదారులకూ ప్రమాదాన్నే తెచ్చిపెడుతుంది. అక్రమ వెబ్‌సైట్లు వ్యక్తిగత సమాచారాన్ని దొంగిలిస్తాయి, పరికరాల్లో మాల్వేర్ చొప్పిస్తాయి. కనుక సురక్షిత మార్గం చట్టబద్ధమైన OTT, థియేటర్లలోనే సినిమాలు చూడటం.