వైరముత్తుకు జ్ఞానపీఠ్ పురస్కారం..సీఎం ఎం.కె. స్టాలిన్ అభినందనలు

సాహిత్య రంగంలో అత్యంత ప్రతిష్టాత్మకమైన జ్ఞానపీఠ్ పురస్కారం (2025) కు ప్రముఖ తమిళ సినీ గేయ రచయిత వైరముత్తు ఎంపికైనట్లు ఎంపిక కమిటీ ఈ రోజు ప్రకటించింది. ఈ సందర్భంగా తమిళనాడు ముఖ్యమంత్రి ఎం.కె. స్టాలిన్, రాజ్యసభ సభ్యుడు కమల్ హాసన్ తదితరులు సోషల్ మీడియా వేదిక ‘ఎక్స్’ ద్వారా వైరముత్తుకు అభినందనలు తెలియజేశారు. తేని జిల్లా మేట్టూర్‌లో 1953లో జన్మించిన వైరముత్తు, కళాశాల విద్యార్థిగా ఉన్నప్పుడే రచనలతో గుర్తింపు పొందారు. ఆయన రచించిన ‘వైకరై మేఘంగళ్’ అనే కవితా సంకలనం అప్పట్లో ఒక మహిళా కళాశాలలో పాఠ్యాంశంగా కూడా చేరింది.

తమిళనాడు ప్రభుత్వ అధికారిక భాషా కమిషన్‌లో పనిచేస్తున్న సమయంలోనే, 1980లో ప్రముఖ దర్శకుడు భారతీరాజా తెరకెక్కించిన ‘నిళల్గళ్’ చిత్రంతో వైరముత్తు తమిళ సినీ పరిశ్రమలో గేయ రచయితగా ప్రవేశించారు. అనంతరం కవితలు, నవలలు వంటి సాహిత్య ప్రక్రియల్లో సుమారు 40 పుస్తకాలు రచించడంతో పాటు, సినిమాల్లో దాదాపు 7,500 పాటలు రాశారు. తన సాహిత్య ప్రతిభతో ఇప్పటికే సాహిత్య అకాడమీ అవార్డు, సాధన సమ్మాన్, పద్మశ్రీ, పద్మభూషణ్ వంటి అనేక ప్రతిష్టాత్మక పురస్కారాలను అందుకున్నారు. ఉత్తమ గేయ రచయితగా ఏడు సార్లు జాతీయ అవార్డులు అందుకున్న ఏకైక రచయితగా కూడా ఆయన గుర్తింపు పొందారు. అలాగే రాష్ట్ర ప్రభుత్వం నుంచి ఉత్తమ గేయ రచయితగా ఆరు సార్లు పురస్కారాలు అందుకున్నారు. తమిళనాడుకు చెందిన అఖిలన్ (1975), జయకాంతన్ (2002) తరువాత జ్ఞానపీఠ్ పురస్కారం అందుకున్న మరో రచయితగా వైరముత్తు నిలిచారు.

ఇదిలా ఉండగా, వైరముత్తుకు జ్ఞానపీఠ్ పురస్కారం దక్కడం పట్ల తమిళనాడు ముఖ్యమంత్రి ఎం.కె. స్టాలిన్ ప్రత్యేకంగా అభినందనలు తెలిపారు. తన కవితా ప్రతిభతో తమిళ భాషకు విశిష్టమైన గుర్తింపు తీసుకొచ్చిన ‘కవిపేరరసు’ వైరముత్తుకు ఈ గౌరవం దక్కడం గర్వకారణమని ఆయన పేర్కొన్నారు. ఇటీవలే వైరముత్తును వ్యక్తిగతంగా కలిసి మాట్లాడినట్లు చెప్పిన స్టాలిన్, ఆ సమావేశం ముగిసిన కొద్దిసేపటికే జ్ఞానపీఠ్ పురస్కారం ప్రకటించబడటం తన ఆనందాన్ని మరింత రెట్టింపు చేసిందని ‘ఎక్స్’లో చేసిన పోస్టులో వెల్లడించారు.