అమెజాన్‌లో భారీ తొలగింపులు – మంగళవారం నుంచే 30,000 మందికి షాక్!

ఇ-కామర్స్ దిగ్గజం అమెజాన్ మరోసారి భారీ ఉద్యోగ కోతలకు సిద్ధమైంది. నివేదికల ప్రకారం, కంపెనీ మంగళవారం నుంచే 30,000 మందికి పైగా కార్పొరేట్ ఉద్యోగులను తొలగించేందుకు సిద్ధమవుతోంది. ఇది కరోనా తర్వాత అమెజాన్‌లో జరిగే అత్యంత పెద్ద లేఆఫ్ రౌండుగా భావిస్తున్నారు.ఈ తొలగింపులు AWS, హ్యూమన్ రిసోర్సెస్ , డివైసెస్ & సర్వీసెస్ విభాగాలను ప్రభావితం చేసే అవకాశం ఉంది.సమాచారం ప్రకారం, ఉద్యోగులకు ఈమెయిల్ ద్వారా నోటిఫికేషన్లు మంగళవారం ఉదయం (అమెరికా సమయం) పంపించనున్నట్లు తెలుస్తోంది.

సీఈఓ ఆండీ జస్సీ నేతృత్వంలో జరుగుతున్న ఈ చర్య కంపెనీని మరింత సన్నగా, చురుకుగా మార్చే కాస్ట్ కటింగ్ వ్యూహంలో భాగమని చెబుతున్నారు.ప్రస్తుతం అమెజాన్‌లో 1.54 మిలియన్ మంది ఉద్యోగులు ఉన్నారు. 2022 నుండి ఇప్పటివరకు కంపెనీ ఇప్పటికే 27,000 మందికి పైగా ఉద్యోగులను తొలగించింది.టెక్ రంగంలో ఇది మరోసారి విపరీతమైన ప్రభావం చూపే లేఆఫ్ వేవ్ అవుతుందని విశ్లేషకులు చెబుతున్నారు. ఇప్పటికే మైక్రోసాఫ్ట్, మెటా, గూగుల్, ఇంటెల్, సేల్స్‌ఫోర్స్ వంటి సంస్థలు కూడా ఉద్యోగులను తగ్గించాయి.