

మెగాస్టార్ చిరంజీవి ఇప్పటివరకు ఎన్నో విభిన్నమైన పాత్రల్లో ప్రేక్షకులను అలరించారు. అయితే పూర్తి స్థాయి డాన్ పాత్రలో మాత్రం ఆయన కనిపించలేదు. ఇప్పుడు దర్శకుడు బాబీ తెరకెక్కిస్తున్న 'కాకా'లో చిరంజీవిని సరికొత్త అవతారంలో చూపించబోతున్నట్లు ప్రచారం జరుగుతోంది. కోల్కతా నగరాన్ని తన గుప్పిట్లో పెట్టుకున్న ఒక డాన్, కొందరిని హతమార్చేందుకు తన గుర్తింపును మార్చుకోవాల్సి వస్తుందట. ఈ క్రమంలో అతడికి ఎదురైన సమస్యలు, చివరకు తీసుకున్న నిర్ణయాల చుట్టూ కథ సాగుతుందని సినీ వర్గాల్లో చర్చ నడుస్తోంది. ఈ పాత్రలో చిరంజీవి నటన మరో స్థాయిలో ఉంటుందని అభిమానులు ఆశిస్తున్నారు. ఇప్పటివరకు చూడని డాన్ అవతారంలో మెగాస్టార్ కనిపించబోతున్నారనే వార్త సినిమాపై అంచనాలను పెంచుతోంది.
బాబీ సాధారణ వాణిజ్య కథలనే ఎంచుకున్నా, వాటిని ఆసక్తికరంగా తెరపై చూపించడంలో ప్రత్యేకమైన శైలి కలిగి ఉన్నారు. గతంలో 'వాల్తేరు వీరయ్య'లో చిరంజీవిని కొత్తగా చూపించి మెప్పించారు. అలాగే బాలయ్యతో తెరకెక్కించిన 'డాకు మహారాజ్'లో కూడా నిర్మాణం, భావోద్వేగ సన్నివేశాల విషయంలో మంచి ప్రతిభ కనబరిచారు. ముఖ్యంగా కథలోని కీలక ఘట్టాలను, భారీ దృశ్యాలను సమర్థంగా తెరకెక్కించగల దర్శకుడిగా గుర్తింపు పొందారు. ఇప్పుడు 'కాకా'తో మరోసారి మెగాస్టార్ను సరికొత్తగా ఆవిష్కరించేందుకు సిద్ధమవుతున్నారు. ఈ చిత్రంలో చిరంజీవి పాత్ర ఎలా ఉండబోతోంది? డాన్గా ఆయన చేసే విన్యాసాలు ఏ స్థాయిలో ఆకట్టుకుంటాయనేది తెరపై చూడాల్సిందే.




















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!