విశాల్ ట్రిపుల్ రోల్.. కథలో ట్విస్ట్!

కోలీవుడ్ యాక్షన్ హీరో విశాల్ స్వీయ దర్శకత్వంలో తెరకెక్కుతున్న మోస్ట్ అవైటెడ్ యాక్షన్ ఎంటర్‌టైనర్ ‘మగుడం’ తెలుగులో ‘మకుటం’ పేరుతో ప్రేక్షకుల ముందుకు రానుంది. సూపర్ గుడ్ ఫిల్మ్స్ బ్యానర్‌పై ఆర్.బి. చౌదరి సమర్పణలో రూపొందుతున్న ఈ చిత్రం సంస్థకు 99వ ప్రాజెక్ట్ కావడంతో మొదటి నుంచే ఆసక్తి నెలకొంది. అంజలి, దుషారా విజయన్ కథానాయికలుగా నటిస్తుండగా, జి.వి. ప్రకాష్ కుమార్ సంగీతం అందిస్తున్నారు. ఇప్పటికే విడుదలైన పోస్టర్లు, టీజర్, పాటలు ప్రేక్షకులను ఆకట్టుకున్నాయి.

తాజాగా 2 నిమిషాల 45 సెకన్ల నిడివితో ట్రైలర్‌ను విడుదల చేశారు. ఇందులో విశాల్ మూడు విభిన్న గెటప్స్‌లో కనిపించడం ప్రధాన ఆకర్షణగా నిలిచింది. కృపాకర్ అనే మెడికల్ రిప్రజెంటేటివ్‌గా సౌమ్యమైన కుటుంబ వ్యక్తి పాత్రలో, లింగా అనే స్మగ్లింగ్ కాంట్రాక్టర్‌గా రఫ్ అండ్ టఫ్ మాస్ లుక్‌లో కనిపించారు. కృపాకర్ జీవితంలోకి లింగా ప్రవేశించిన తర్వాత ఎదురయ్యే పరిణామాలు ఆసక్తిని రేకెత్తిస్తున్నాయి. మరో మూడో పాత్రలోనూ విశాల్ కనిపించడంతో ఈ మూడు పాత్రలు వేర్వేరు వ్యక్తులా? లేక ఒకే వ్యక్తికి మూడు కోణాలా? అనే సస్పెన్స్‌ను ట్రైలర్ మరింత పెంచింది.