విద్యా రంగంలో మార్పులకు రేవంత్ సర్కార్ శ్రీకారం

విద్యార్థుల ప్రయోజనాలే లక్ష్యంగా రాష్ట్రంలో విద్యా సంస్కరణలు చేపడుతున్నామని ముఖ్యమంత్రి ఎ. రేవంత్ రెడ్డి తెలిపారు. నర్సరీ నుంచి యూనివర్సిటీ స్థాయి వరకు నాణ్యమైన విద్యను అందించి, ఆధునిక ప్రపంచ అవసరాలకు అనుగుణంగా విద్యార్థులను తీర్చిదిద్దడమే ప్రభుత్వ లక్ష్యమని స్పష్టం చేశారు. ఎంసీఆర్‌హెచ్ఆర్డీలో విద్యాశాఖపై నిర్వహించిన ఉన్నతస్థాయి సమీక్ష సమావేశంలో వచ్చే విద్యా సంవత్సరం నుంచి 12వ తరగతి వరకు కొత్త విద్యా విధానాన్ని అమలు చేయాలని అధికారులను ఆదేశించారు. ప్రతిపాదిత విధానం ప్రకారం నర్సరీ నుంచి 4వ తరగతి వరకు ప్రాథమిక విద్యగా, 5 నుంచి 8వ తరగతి వరకు సెకండరీ విద్యగా, 9 నుంచి 12వ తరగతి వరకు సీనియర్ సెకండరీ విద్యగా విభజించాలని సూచించారు. 12వ తరగతి పూర్తయ్యే నాటికి విద్యార్థులు భాషా, సమాచార నైపుణ్యాల్లో పట్టు సాధించాలని, ఆ తర్వాత తమకు నచ్చిన సబ్జెక్టులను ఎంచుకొని వాటిలో నైపుణ్యం పెంచుకునే అవకాశం ఉండాలని పేర్కొన్నారు.

10వ తరగతి తర్వాత విద్యార్థులు చదువు మానేస్తున్నారని, వారిలో బాలికలు, దళిత, గిరిజన, మైనారిటీ వర్గాలకు చెందిన పిల్లల సంఖ్య ఎక్కువగా ఉంటోందని ముఖ్యమంత్రి ఆందోళన వ్యక్తం చేశారు. 12వ తరగతి వరకు విద్య అందించే కేంద్రీయ విద్యాలయాలు, నవోదయ విద్యాలయాలు, కస్తూర్బా గాంధీ బాలికా విద్యాలయాల్లో డ్రాపౌట్ల సంఖ్య తక్కువగా ఉంటోందని గుర్తుచేశారు. ఈ నిర్ణయం విద్యార్థుల ప్రయోజనాలను దృష్టిలో ఉంచుకునే తీసుకున్నామని, జూనియర్ కళాశాలల లెక్చరర్లు, బోధనేతర సిబ్బంది ఉద్యోగ, పదవీ విరమణ ప్రయోజనాలకు ఎలాంటి ఇబ్బంది కలగకుండా చూస్తామని హామీ ఇచ్చారు. సంక్షేమ వసతి గృహాలు, రెసిడెన్షియల్ పాఠశాలలు అద్దె భవనాల్లో కొనసాగకుండా అవసరమైన సదుపాయాలతో శాశ్వత భవనాలు నిర్మించాలని ఆదేశించారు. యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల (YIIRS) నిర్మాణ పనులను వేగవంతం చేయాలని, CURE పరిధిలోని పాఠశాలల నిర్మాణ పురోగతిని సమీక్షించి అవసరమైన చోట పనులు చేపట్టాలని సూచించారు. ఐటీఐలను అడ్వాన్స్‌డ్ ట్రైనింగ్ సెంటర్లుగా (ATCs) అప్‌గ్రేడ్ చేయడం వల్ల విద్యార్థుల నమోదు, ఉపాధి అవకాశాలు పెరిగాయని తెలిపారు. పాలిటెక్నిక్‌ల ఆధునికీకరణకు నిధుల విడుదలను వేగవంతం చేయాలని, యూనివర్సిటీల్లో అసిస్టెంట్, అసోసియేట్, ఇతర ప్రొఫెసర్ల నియామకాలను నిబంధనల ప్రకారం త్వరగా పూర్తి చేయాలని అధికారులను ఆదేశించారు.