‘సిట్యుయేషన్‌షిప్’ వివాదం.. భర్తతో సారీ చెప్పించిన రకుల్

బాలీవుడ్ జంట రకుల్ ప్రీత్ సింగ్, జాకీ భగ్నానీ ఇటీవల సోషల్ మీడియాలో చర్చనీయాంశంగా మారారు. జాకీ చేసిన ఒక వ్యాఖ్య వారి వైవాహిక జీవితంపై వివాదానికి దారితీసింది. ఒక ఇంటర్వ్యూలో ఆయన తమ సంబంధాన్ని ‘సిట్యుయేషన్‌షిప్’గా పేర్కొనడంతో నెటిజన్లు ఆశ్చర్యం వ్యక్తం చేస్తూ విమర్శలు గుప్పించారు. పెళ్లి అయిన తర్వాత కూడా ఇలాంటి పదం వాడటం ఏమిటని ప్రశ్నలు లేవనెత్తారు.

అయితే ఈ వివాదంపై రకుల్ సరదాగా స్పందిస్తూ ఒక వీడియోను పంచుకున్నారు. జాకీ పక్కనే ఉండగా ఆయనను ఆటపట్టిస్తూ, ఇలాంటి పదాలు వాడొద్దని ముందే చెప్పానని నవ్వుతూ చెప్పారు. దీనికి జాకీ చెవులు పట్టుకుని క్షమాపణ చెప్పారు. తాను ఆ ఉద్దేశంతో అనలేదని వివరణ ఇచ్చారు. ఈ విషయాన్ని పెద్దగా పట్టించుకోవద్దని, నవ్వుకుంటూ వదిలేయాలని ఈ జంట అభిమానులకు సూచించింది.

ఇక ముందుగా ఈ అంశంపై రకుల్ కొంత అసహనం వ్యక్తం చేశారు. ఒక పెద్ద సంభాషణలోని చిన్న భాగాన్ని తీసుకుని తప్పుగా అర్థం చేసుకోవడం సరికాదని ఆమె అన్నారు. తమ బంధం ఎంతో స్వేచ్ఛగా, పరస్పర నమ్మకంతో కొనసాగుతోందని స్పష్టం చేశారు. తమ సంబంధం ప్రత్యేకమైందని, చిన్న విషయాలపై ఆధారపడని బలమైన బంధమని రకుల్ వివరించారు.