చిరు లీక్స్‌పై రామ్ చరణ్ సరదా కామెంట్స్

మహేశ్ ఉప్పల దర్శకత్వంలో అనీష్ హీరోగా పరిచయమవుతున్న చిత్రం ‘ఇట్లు అర్జున’. అనస్వర రాజన్ కథానాయికగా నటిస్తున్న ఈ సినిమాను వెంకీ కుడుముల నిర్మిస్తున్నారు. అక్కినేని నాగార్జున సమర్పణలో తెరకెక్కిన ఈ చిత్రం నవంబర్ 13న ప్రేక్షకుల ముందుకు రానుంది. ప్రమోషన్లలో భాగంగా సోమవారం రాత్రి హైదరాబాద్‌లో నిర్వహించిన మ్యూజికల్ కాన్సర్ట్‌కు మెగా పవర్ స్టార్ రామ్ చరణ్ ముఖ్య అతిథిగా హాజరయ్యారు. ఈ సందర్భంగా ఆయన చేసిన సరదా వ్యాఖ్యలు కార్యక్రమంలో నవ్వులు పూయించాయి.

అనస్వర రాజన్‌ను ‘ఛాంపియన్’ సినిమా సమయంలో కలిశానని, ఇటీవల ఆమె నటనను ప్రత్యక్షంగా చూశానని రామ్ చరణ్ తెలిపారు. మెగాస్టార్ చిరంజీవి హీరోగా బాబీ కొల్లి దర్శకత్వంలో తెరకెక్కుతున్న ‘కాకా’ సినిమాలో అనస్వర కీలక పాత్ర పోషిస్తున్నారని చెప్పారు. అయితే సినిమాలో చిరంజీవి, అనస్వర మధ్య ఉన్న సంబంధం గురించి తాను చెప్పనని, ‘చిరు లీక్స్’ తరహాలో ఎలాంటి విషయాలనూ బయటపెట్టనని సరదాగా వ్యాఖ్యానించారు. ఇక ‘ఇట్లు అర్జున’ గురించి మాట్లాడుతూ, ఈ సినిమా బ్లాక్‌బస్టర్ అవుతుందని ధీమా వ్యక్తం చేశారు. అనస్వర ఈ చిత్రంలో అద్భుతంగా నటించారని ప్రశంసించారు. సంక్రాంతికి ఆమె మరో విజయాన్ని అందుకుంటారని కూడా పేర్కొన్నారు. రామ్ చరణ్ వ్యాఖ్యలు, ముఖ్యంగా ‘కాకా’లో అనస్వర పాత్రపై చేసిన కామెంట్స్ అభిమానుల్లో ఆసక్తిని పెంచాయి.