పైరసీకి బ్రేక్ పడుతుందా? ఇమ్మడి రవి అరెస్ట్‌తో టాలీవుడ్‌లో సరికొత్త ఆశలు!

టాలీవుడ్ ఈ రోజు ఆనందంలో ఉంది. పైరసీకి భారీ స్థాయిలో కారణమైన ఐబొమ్మ నిర్వాహకుడు ఇమ్మడి రవి అరెస్ట్ కావడంతో పాటు, అతని యాప్‌లు మూసివేయబడటం దీనికి ముఖ్య కారణం. పోలీస్ కమిషనర్ సజ్జనార్‌తో కలిసి సినీ ప్రముఖులు చేసిన ప్రెస్ మీట్‌ను బట్టి చూస్తే, పెద్ద ప్రమాదం తప్పినట్టే కనిపిస్తోంది.

ఇరవై వేల సినిమాలు హార్డ్‌డిస్క్‌లో దాచుకుని, కేవలం పైరసీ ద్వారానే ఇరవై కోట్లు సంపాదించిన రవి తెలివితేటలు పోలీసులను కూడా ఆశ్చర్యపరిచాయి. "దమ్ముంటే పట్టుకోండి" అంటూ చాలెంజ్ చేసిన అతడే చివరకు జైలు చేరాడు.

ఇప్పుడు ప్రశ్న ఏమిటంటే—ఇదంతా అయ్యాక పైరసీ కథ ముగిసిందా?
అదే ఒక్కసారిగా చెప్పలేము. ఎందుకంటే ప్రపంచవ్యాప్తంగా ఉన్న పైరసీ వ్యవస్థ ఒక్క ఇమ్మడి రవి వల్లే కాదు. అతను ఒక ప్రధాన వ్యక్తి మాత్రమే. ఇంకా ఈ నెట్వర్క్‌లో పాల్గొంటున్న అనేక గ్రూపుల్ని పట్టుకోవాలి.

ప్రత్యేకంగా సినిమాలు రిలీజ్ అయ్యే రోజే ప్రింట్లు అప్లోడ్ చేసే తమిళ్ టొరెంట్ గ్రూపులు (Tamil MV, Tamil Rockers వంటి) పెద్ద ప్రమాదం. ఇది అంతర్జాతీయ నెట్‌వర్క్. ఈ గ్రూపులపై కూడా చర్యలు తీసుకుంటేనే అసలు ఫలితం కనిపిస్తుంది.

హైదరాబాద్ పోలీసులు ఇప్పుడు వీరినే లక్ష్యంగా పెట్టుకోవాలి. ఇందులో విజయం సాధిస్తే సినిమా పరిశ్రమకు భారీ లాభం. పైరసీ దొరకదని ప్రజలకు నమ్మకం కలిగితే థియేటర్లకు వచ్చే వారి సంఖ్య పెరుగుతుంది. ఇలా కనీసం సగం మంది అయినా టికెట్లు కొంటే, బాక్సాఫీస్‌కు వందల కోట్ల ఆదాయం పెరుగుతుంది.

సజ్జనార్ వ్యాఖ్యలను బట్టి చూస్తే, ఈ కేసును తేలిగ్గా వదిలే ఉద్దేశం పోలీసులకు కనిపించడంలేదు. కెమెరా ప్రింట్స్ నుంచి హెచ్‌డీ వర్షన్ల వరకు ఎదిగిపోయిన పైరసీ వ్యవస్థకు ప్రధాన కారణమైన సర్వర్లను పూర్తిగా అప్‌గ్రేడ్ చేయించి బ్లాక్ చేయడం అత్యవసరం.
ఇది ముందుగా చేయాల్సిన కీలక పని.