యాక్షన్‌ ఎంటర్‌టైనర్ ‘దాదా’.. షూటింగ్‌కు బాలయ్య రీఎంట్రీ

నందమూరి బాలకృష్ణ ‘దాదా’ సినిమా కోసం తిరిగి షూటింగ్‌లో పాల్గొంటున్నారు. జులైలో ఈ సినిమా సెట్స్‌లో గాయపడిన బాలయ్య, అనంతరం శస్త్రచికిత్స చేయించుకున్న విషయం తెలిసిందే. తాజాగా గాయం నుంచి పూర్తిగా కోలుకోవడంతో మళ్లీ కెమెరా ముందుకు వచ్చారు. మంగళవారం నుంచి మైసూర్‌లో ఈ చిత్రం కొత్త షెడ్యూల్‌ ప్రారంభమైంది. ఈ షెడ్యూల్‌లో బాలకృష్ణతో పాటు ప్రధాన తారాగణంపై కీలక టాకీ సన్నివేశాలను చిత్రీకరిస్తున్నట్లు చిత్ర బృందం వెల్లడించింది.

ముంబయి నేపథ్యంలో తెరకెక్కుతున్న ఈ సినిమా స్టైలిష్‌ యాక్షన్‌ ఎంటర్‌టైనర్‌గా రూపొందుతోంది. ఇందులో బాలకృష్ణ రెండు విభిన్న కోణాల్లో సాగే పాత్రలో కనిపించనున్నట్లు సమాచారం. ప్రస్తుతం ముగింపు దశలో ఉన్న ఈ చిత్రాన్ని క్రిస్మస్‌ సందర్భంగా డిసెంబరు 24న విడుదల చేసేందుకు మేకర్స్‌ సన్నాహాలు చేస్తున్నారు. గోపీచంద్‌ మలినేని దర్శకత్వం వహిస్తున్న ఈ చిత్రాన్ని వెంకట సతీశ్‌ కిలారు నిర్మిస్తున్నారు. తమన్‌ సంగీతం అందిస్తుండగా, అరవింద్‌ ఎస్. కశ్యప్‌ ఛాయాగ్రహణం నిర్వహిస్తున్నారు.