నచ్చలేదన్న ఆమిర్.. చివరికి చరిత్ర సృష్టించిన అదే కథ!

భారతీయ సినీ చరిత్రలో ప్రత్యేక స్థానం సంపాదించిన ‘లగాన్’ విడుదలై నేటితో 25 సంవత్సరాలు పూర్తయ్యాయి. అశుతోష్ గోవారికర్ దర్శకత్వంలో, ఆమిర్ ఖాన్ ప్రధాన పాత్రలో తెరకెక్కిన ఈ చిత్రం ప్రేక్షకుల హృదయాలను గెలుచుకోవడమే కాకుండా ఆస్కార్ నామినేషన్ సాధించి అంతర్జాతీయ స్థాయిలో గుర్తింపు పొందింది. సత్యజిత్ భట్కల్ రచించిన ‘ది స్పిరిట్ ఆఫ్ లగాన్’ పుస్తకం ప్రకారం, ఈ చిత్ర ప్రయాణం 1996లో ప్రారంభమైంది.

మొదట ఈ కథను విన్న ఆమిర్ ఖాన్ దానిని తిరస్కరించినట్లు పుస్తకంలో వెల్లడించారు. అయితే దర్శకుడు వెనుకడుగు వేయకుండా స్క్రిప్ట్‌ను మరింత మెరుగుపరిచి మళ్లీ వినిపించారు. రెండోసారి కథ విన్న ఆమిర్ భావోద్వేగానికి గురై చిత్రంపై విశ్వాసం వ్యక్తం చేశారు. నిర్మాతల నుంచి మద్దతు లభించకపోయినా, చివరికి ఆమిర్ స్వయంగా నిర్మాతగా, హీరోగా ముందుకు రావడంతో ‘లగాన్’ భారతీయ సినీ చరిత్రలో చిరస్థాయిగా నిలిచిన చిత్రంగా అవతరించింది.