ప్రభుత్వాన్ని కూల్చే వరకు పోరాడతా - ఈటల రాజేందర్

జవహర్‌నగర్ డంపింగ్ యార్డును తరలించాలని డిమాండ్ చేస్తూ బీజేపీ ఎంపీ ఈటల రాజేందర్ చేపట్టిన పాదయాత్ర కొనసాగుతోంది. ఈ సందర్భంగా కాంగ్రెస్ ప్రభుత్వంపై ఆయన తీవ్ర వ్యాఖ్యలు చేశారు. డంపింగ్ యార్డును తొలగించే వరకు మాత్రమే కాకుండా, రేవంత్ రెడ్డి ప్రభుత్వాన్ని కూల్చే వరకు తన పోరాటం కొనసాగిస్తానని స్పష్టం చేశారు. తాను పాదయాత్ర చేస్తుంటే పనిలేక తిరుగుతున్నారని కాంగ్రెస్ నాయకులు విమర్శిస్తున్నారంటూ ప్రస్తావించిన ఈటల.. డంపింగ్ యార్డు సమస్య పరిష్కారమయ్యే వరకు వెనక్కి తగ్గేది లేదని అన్నారు. జవహర్‌నగర్ డంపింగ్ యార్డులో వ్యర్థాల రీసైక్లింగ్‌కు ఎంత ఖర్చవుతుందో అంచనా వేసి సమగ్ర ప్రాజెక్టు నివేదిక (డీపీఆర్) సిద్ధం చేసి ఇవ్వాలని రాష్ట్ర ప్రభుత్వాన్ని కోరారు. అవసరమైన నిధుల కోసం ప్రధాని నరేంద్ర మోదీని ఒప్పించి డబ్బులు తీసుకొస్తానని, అలా చేయలేకపోతే రాజకీయాల నుంచి తప్పుకుంటానని సవాల్ విసిరారు.

ఈ నెల 27న ఏదులాబాద్‌లోని శ్రీరంగనాథ స్వామి ఆలయంలో ప్రత్యేక పూజలు నిర్వహించిన అనంతరం ఈటల రాజేందర్ తన పాదయాత్రను ప్రారంభించారు. జవహర్‌నగర్ డంపింగ్ యార్డు నుంచి వెలువడుతున్న కాలుష్యం కారణంగా చుట్టుపక్కల గ్రామాలు, కాలనీల ప్రజల ఆరోగ్యం తీవ్రంగా ప్రభావితమవుతోందని ఆయన పేర్కొన్నారు. ఆ ప్రాంతంలో గాలి, భూగర్భ జలాలు కలుషితమయ్యాయని ఆరోపిస్తూ, డంపింగ్ యార్డును వెంటనే తొలగించాలని డిమాండ్ చేశారు. స్థానిక ప్రజల ఆరోగ్యం, పర్యావరణ పరిరక్షణ దృష్ట్యా ఈ సమస్యకు శాశ్వత పరిష్కారం చూపాలని ఆయన కోరుతున్నారు.