విద్యుత్ రిపేర్లకు తమిళనాడు సాయం కోరిన ఏపీ

ముఖ్యమంత్రి చంద్రబాబు నాయుడు సూచనల మేరకు ఆంధ్రప్రదేశ్ విద్యుత్ శాఖ మంత్రి గొట్టిపాటి రవికుమార్ తమిళనాడు విద్యుత్ శాఖ మంత్రికి ఫోన్ చేశారు. తుపాను ఆర్నబ్ కారణంగా రాష్ట్రంలోని పలు ప్రాంతాల్లో జరిగిన నష్టాన్ని ఆయనకు వివరించారు. తుపాను ప్రభావిత ప్రాంతాల్లో విద్యుత్ సరఫరాను వేగంగా పునరుద్ధరించేందుకు అవసరమైన సహకారం అందించాలని కోరారు.

దీనిపై స్పందించిన తమిళనాడు ప్రభుత్వం విద్యుత్ శాఖ సిబ్బందితో పాటు అవసరమైన సామాగ్రిని ఏపీకి పంపేందుకు సుముఖత వ్యక్తం చేసినట్లు సమాచారం. ఇప్పటికే విద్యుత్ పునరుద్ధరణ పనుల కోసం ఆంధ్రప్రదేశ్ ప్రభుత్వం తెలంగాణ సాయాన్ని కూడా కోరింది. తెలంగాణ సరిహద్దు జిల్లాల నుంచి వచ్చిన విద్యుత్ సిబ్బంది తుపాను ప్రభావిత ప్రాంతాల్లో పనిచేస్తూ సరఫరా పునరుద్ధరణకు సహకరిస్తున్నారు. ఇతర రాష్ట్రాల సహకారంతో విద్యుత్ వ్యవస్థను త్వరగా సాధారణ స్థితికి తీసుకురావడంపై ప్రభుత్వం దృష్టి సారించింది.