ఆదర్శ కుటుంబం AK47 సినిమా ఎలా ఉందంటే?

విక్టరీ వెంకటేష్ హీరోగా, మాటల మాంత్రికుడు త్రివిక్రమ్ శ్రీనివాస్ దర్శకత్వంలో తెరకెక్కిన చిత్రం ‘ఆదర్శ కుటుంబం AK47’. హారిక అండ్ హాసిని క్రియేషన్స్ బ్యానర్‌పై ఎస్. రాధాకృష్ణ (చినబాబు) ఈ సినిమాను నిర్మించారు. శ్రీనిధి శెట్టి కథానాయికగా నటించింది. పలుమార్లు వాయిదా పడిన ఈ చిత్రం ఎట్టకేలకు అక్టోబర్ 30న ప్రేక్షకుల ముందుకు రానుంది. ఇప్పటికే సెన్సార్ కార్యక్రమాలు పూర్తిచేసుకున్న ఈ సినిమాకు యు/ఏ సర్టిఫికెట్ లభించింది. టీజర్, ట్రైలర్, పాటలు ఆశించిన స్థాయిలో బజ్‌ను సృష్టించలేకపోయినప్పటికీ, ఇటీవల ఇండస్ట్రీకి చెందిన కొందరికి నిర్మాతలు ప్రత్యేక ప్రదర్శన ఏర్పాటు చేసినట్లు సమాచారం.

ప్రత్యేక ప్రదర్శన అనంతరం అందిన సమాచారం ప్రకారం, ఈ సినిమా నిడివి 2 గంటల 29 నిమిషాలు. స్వర్ణ (శ్రీనిధి శెట్టి) చిట్‌ఫండ్ కంపెనీలో డబ్బులు పెట్టి మోసపోవడంతో ఆమె కుటుంబం ఆర్థిక ఇబ్బందుల్లో పడుతుంది. అప్పులు తీర్చేందుకు ప్రయత్నిస్తున్న భర్త చిట్టిబాబు (వెంకటేష్) ఉద్యోగం కూడా కోల్పోతాడు. అనుకోకుండా లాటరీ తగలడంతో కుటుంబం ఓ విలాసవంతమైన ఇంటికి మారుతుంది. అయితే, అక్కడికి వెళ్లిన తర్వాత వారు ఓ క్రైమ్ కేసులో చిక్కుకుంటారు. చిట్టిబాబు గతం, అతను జైలుకు వెళ్లాల్సిన పరిస్థితులు, సంపూర్ణ వారి సొంత కూతురేనా అనే ప్రశ్నల చుట్టూ కథ సాగుతుందని తెలుస్తోంది. ఫస్ట్ హాఫ్ వేగంగా సాగుతూ వెంకటేష్, శ్రీనిధి శెట్టి మధ్య హాస్య సన్నివేశాలు, పంచ్ డైలాగులతో అలరిస్తుందని, సెకండాఫ్‌లో క్రైమ్ ఎపిసోడ్లు, ట్విస్టులు ఆకట్టుకుంటాయని ప్రాథమిక టాక్. అయితే, ఇవి ప్రత్యేక ప్రదర్శన అనంతరం వచ్చిన అభిప్రాయాలు మాత్రమే. సినిమా పూర్తి స్థాయి స్పందన విడుదల తర్వాతే స్పష్టమవుతుంది.