జలంధర్ ఆర్మీ పబ్లిక్ స్కూల్‌కు బాంబు బెదిరింపు.. రైళ్లను పేల్చేస్తామంటూ ఈమెయిల్

పంజాబ్‌లోని జలంధర్ కంటోన్మెంట్‌లో ఉన్న ఆర్మీ పబ్లిక్ స్కూల్‌కు బాంబు బెదిరింపు ఈమెయిల్ రావడం కలకలం రేపింది. పాఠశాల అధికారిక ఈమెయిల్ ఖాతాకు ఉదయం 8:55 గంటల సమయంలో గుర్తుతెలియని వ్యక్తులు ఈ సందేశాన్ని పంపినట్లు సమాచారం. పాఠశాలలో ఇంప్రొవైజ్డ్ ఎక్స్‌ప్లోసివ్ డివైజ్‌ (ఐఈడీ) పేలుళ్లు జరుపుతామని అందులో హెచ్చరించారు. పంజాబ్, ఖలిస్థాన్‌కు సంబంధించిన నినాదాలను కూడా ప్రస్తావించారు. నవంబర్ 4న సంగ్రూర్‌లో జరగనున్న కాంగ్రెస్ అగ్రనేత రాహుల్ గాంధీ బహిరంగ సభను సైతం ఈమెయిల్‌లో ప్రస్తావించడంతో భద్రతాపరమైన ఆందోళనలు వ్యక్తమయ్యాయి.

నవంబర్ 1 నుంచి 4వ తేదీ వరకు రైళ్లలో ప్రయాణించవద్దని కూడా ఆ సందేశంలో హెచ్చరించినట్లు సమాచారం. అమృత్‌సర్, లూధియానా, ఫిరోజ్‌పూర్, భటిండా మార్గాల్లో నడిచే రైళ్లు, రైల్వే ట్రాక్‌లను లక్ష్యంగా చేసుకుంటామని బెదిరించారు. ఈమెయిల్ అందిన వెంటనే పోలీసులు, భద్రతా సంస్థలు అప్రమత్తమయ్యాయి. సైబర్ క్రైమ్ బృందాలు రంగంలోకి దిగి సాంకేతిక ఆధారాల ద్వారా ఈమెయిల్ పంపిన వ్యక్తిని గుర్తించేందుకు ప్రయత్నిస్తున్నాయి. ఐపీ అడ్రస్ సహా ఇతర వివరాలను పరిశీలిస్తూ పోలీసులు దర్యాప్తు కొనసాగిస్తున్నారు.