9 గిన్నిస్ రికార్డులతో భారత కుర్రాడి సంచలనం..

మహారాష్ట్రలోని నాశిక్‌కు చెందిన 16 ఏళ్ల ఆర్యన్ శుక్లా తన అసాధారణ గణిత ప్రతిభతో ప్రపంచవ్యాప్తంగా గుర్తింపు పొందుతున్నాడు. ‘హ్యూమన్ కాలిక్యులేటర్’గా పేరొందిన అతడు అత్యంత క్లిష్టమైన లెక్కలను సైతం కేవలం కొన్ని సెకన్లలోనే పూర్తి చేయగలడు. వేగం, కచ్చితత్వంతో లెక్కలు చేయడంలో అతడి ప్రతిభ అందరినీ ఆశ్చర్యపరుస్తోంది. ఆర్టిఫిషియల్ ఇంటెలిజెన్స్ (AI)తో పోల్చదగిన వేగంతో గణనలు చేయగల సామర్థ్యం అతడిని ప్రత్యేకంగా నిలబెడుతోంది.

ఆర్యన్ కేవలం 12 ఏళ్ల వయసులోనే మెంటల్ కాలిక్యులేషన్ వరల్డ్ కప్‌ను గెలుచుకుని ప్రపంచ ఛాంపియన్‌గా నిలిచాడు. ఫిబ్రవరి 2024 నుంచి ఇప్పటివరకు తన అసాధారణ గణన సామర్థ్యంతో మొత్తం తొమ్మిది గిన్నిస్ వరల్డ్ రికార్డులను సాధించినట్లు సమాచారం. రికార్డులు సృష్టించడమే కాకుండా ప్రస్తుతం ఇతర పిల్లలకు మెంటల్ మ్యాథ్స్ నేర్పిస్తూ తన ప్రతిభను పంచుకుంటున్నాడు. చిన్న వయసులోనే గణితంపై ఆసక్తి పెంచుకుంటే అద్భుతాలు సాధించవచ్చని ఆర్యన్ తన విజయాలతో నిరూపిస్తున్నాడు.