దంతాల్లో క్యావిటీస్ రాకుండా ఉండాలంటే ఇవి తప్పనిసరిగా పాటించాలి.. వైద్యుల సూచనలు!

దంతాల్లో క్యావిటీస్ (పుచ్చిపోవడం) ఏర్పడటానికి తీపి పదార్థాలు ఎక్కువగా తినడం, సరిగ్గా బ్రష్ చేయకపోవడం మాత్రమే కారణాలు కావు. శరీరానికి అవసరమైన కొన్ని పోషకాలు అందకపోవడం కూడా దంతాల ఆరోగ్యంపై ప్రభావం చూపుతుంది. ముఖ్యంగా ఫ్లోరైడ్ అనే ఖనిజం దంతాల బయటి పొర అయిన ఇనామెల్‌ను బలోపేతం చేయడంలో కీలక పాత్ర పోషిస్తుంది. ఆహారంలోని చక్కెరలు, పిండి పదార్థాలపై నోటిలోని బ్యాక్టీరియా చర్య జరిపినప్పుడు విడుదలయ్యే ఆమ్లాల నుంచి దంతాలను రక్షించడంలో ఫ్లోరైడ్ సహాయపడుతుంది. తగినంత ఫ్లోరైడ్ అందకపోతే దంతాలపై ఖనిజాలు కోల్పోయే ప్రక్రియ పెరిగి, క్యావిటీస్ ఏర్పడే ప్రమాదం అధికమవుతుంది.

ఫ్లోరైడ్‌తో పాటు కాల్షియం, భాస్వరం, విటమిన్ డి కూడా దంతాల ఆరోగ్యానికి అవసరం. ఇవి దంతాల నిర్మాణం, దృఢత్వాన్ని కాపాడటంలో సహాయపడతాయి. మరోవైపు, తరచూ స్వీట్లు తినడం, చక్కెర పానీయాలు తీసుకోవడం, నోరు పొడిబారడం, నోటి పరిశుభ్రత పాటించకపోవడం వల్ల కూడా క్యావిటీస్ సమస్య తలెత్తవచ్చు. ఈ సమస్యను నివారించేందుకు రోజుకు రెండుసార్లు ఫ్లోరైడ్ టూత్‌పేస్ట్‌తో బ్రష్ చేయాలి. భోజనం తర్వాత నోటిని శుభ్రం చేసుకోవాలి. చక్కెర పదార్థాల వినియోగాన్ని తగ్గించాలి. ఫ్లోరైడ్‌ను అధికంగా తీసుకోవడం వల్ల దంతాలపై తెల్లటి లేదా గోధుమ రంగు మచ్చలు ఏర్పడే అవకాశం ఉన్నందున, సప్లిమెంట్లు వాడే ముందు దంత వైద్యుల సలహా తీసుకోవాలి.