శ్రీశైలంలో నేటి నుంచి కార్తీక మాసోత్సవాలు.. దర్శన వేళల్లో కీలక మార్పులు!

ప్రముఖ శైవ క్షేత్రమైన శ్రీశైలంలో నేటి నుంచి వచ్చే నెల 9వ తేదీ వరకు కార్తీక మాసోత్సవాలు నిర్వహించనున్నారు. ఈ సందర్భంగా స్వామివారి దర్శనానికి పెద్ద సంఖ్యలో భక్తులు తరలివచ్చే అవకాశం ఉండటంతో ఆలయ అధికారులు ప్రత్యేక ఏర్పాట్లు చేస్తున్నారు. కార్తీక మాసమంతా భక్తుల రద్దీని దృష్టిలో ఉంచుకుని గర్భాలయ అభిషేకాలు, సామూహిక అభిషేకాలను నిలిపివేయాలని నిర్ణయించారు.

అలాగే కార్తీక శని, ఆది, సోమవారాలతో పాటు కార్తీక పౌర్ణమి, ఏకాదశి రోజుల్లో స్వామివారి స్పర్శ దర్శనాలను రద్దు చేశారు. మిగిలిన సాధారణ రోజుల్లో ఐదు విడతలుగా భక్తులకు స్వామివారి స్పర్శ దర్శనం కల్పించనున్నారు. కార్తీక మాసంలో శ్రీశైలానికి వచ్చే భక్తులు ఆలయ నిబంధనలు, దర్శన వేళలను గమనించి తమ యాత్రను ప్రణాళిక చేసుకోవాలని అధికారులు సూచిస్తున్నారు.