చల్లటి నీరు తాగితే రోగనిరోధక శక్తి తగ్గుతుందా? డాక్టర్స్ సూచనలు

ఎండాకాలంలో ఉష్ణోగ్రతలు పెరిగే కొద్దీ చల్లటి నీళ్లు, ఫ్రిజ్ వాటర్, ఐస్‌క్రీమ్‌లు తీసుకోవడం చాలా మందికి అలవాటుగా మారుతుంది. అయితే వైద్య నిపుణుల ప్రకారం, ఇలా అధికంగా చల్లటి పదార్థాలు తీసుకోవడం వల్ల ఆరోగ్య సమస్యలు తలెత్తే ప్రమాదం ఉంది. ముఖ్యంగా సైనసైటిస్ సమస్యలు రావచ్చని, దీన్ని నిర్లక్ష్యం చేస్తే ఆస్తమాగా మారే అవకాశం ఉందని వారు హెచ్చరిస్తున్నారు. ఎండల నుంచి ఉపశమనం పొందడానికి తీసుకునే ఈ అలవాట్లు శరీరంపై ప్రతికూల ప్రభావం చూపవచ్చని సూచిస్తున్నారు.

సాధారణంగా సైనస్ సమస్యలు వర్షాకాలం లేదా చలికాలంలో ఎక్కువగా కనిపిస్తాయి. కానీ ఎండాకాలంలో కూడా చల్లటి నీరు, ఐస్‌క్రీమ్‌లను ఎక్కువగా తీసుకోవడం వల్ల జలుబు, తలనొప్పి వంటి సమస్యలు ఏర్పడతాయి. ఇవి కొనసాగితే దీర్ఘకాలిక సమస్యలుగా మారే ప్రమాదం ఉంది. అలాగే చల్లటి నీటిని తరచుగా తాగడం వల్ల జీర్ణక్రియ మందగించడం, గొంతు నొప్పి, కడుపు ఉబ్బరం, మలబద్ధకం వంటి ఇబ్బందులు ఎదురవుతాయి. చల్లటి నీరు శరీరంలోని రక్తనాళాలను కుంచించుకుపోయేలా చేసి ఆహారం సరిగా జీర్ణం కాకుండా చేస్తుందని, దీని వల్ల జీర్ణశక్తి బలహీనపడుతుందని ఆయుర్వేద నిపుణులు చెబుతున్నారు.

అదేవిధంగా చల్లటి నీరు తాగడం వల్ల గొంతు బొంగురుపోవడం, జలుబు, దగ్గు వంటి సమస్యలు కూడా వచ్చే అవకాశముంది. ఇది రోగనిరోధక శక్తిని తగ్గించవచ్చని నిపుణులు పేర్కొంటున్నారు. అందువల్ల వేసవిలో కూడా అతిగా చల్లటి నీరు తాగకుండా, కుండలోని నీరు లేదా సాధారణ ఉష్ణోగ్రతలో ఉన్న నీటిని తీసుకోవడం మంచిదని సూచిస్తున్నారు. శరీరాన్ని హైడ్రేటెడ్‌గా ఉంచేందుకు సరైన విధానాలు పాటించడం ఆరోగ్యానికి ఎంతో ఉపయోగకరమని ఆరోగ్య నిపుణులు సలహా ఇస్తున్నారు.