తరచూ తలనొప్పి వస్తుందా? ఐరన్ పరీక్ష చేయించుకోండి - వైద్యులు

మైగ్రేన్ తలనొప్పి మరియు ఐరన్ లోపం వల్ల వచ్చే రక్తహీనత (అనీమియా) మధ్య సంబంధం ఉండే అవకాశం ఉందని తాజా అధ్యయనం వెల్లడించింది. అయితే రక్తహీనతే మైగ్రేన్‌కు నేరుగా కారణమని ఈ పరిశోధన నిర్ధారించలేదు. కానీ ఐరన్ లోపం ఉన్నవారిలో మైగ్రేన్ వచ్చే ప్రమాదం ఎక్కువగా ఉండవచ్చని పరిశోధకులు సూచించారు.

పబ్‌మెడ్‌లో ప్రచురితమైన అధ్యయనం ప్రకారం, హిమోగ్లోబిన్ స్థాయిలు తగ్గిపోవడంతో మెదడుకు అవసరమైన ఆక్సిజన్ సరిపడా అందకపోవడం వల్ల మైగ్రేన్ వచ్చే అవకాశం ఉందని భావిస్తున్నారు. అయితే ఈ అంశంపై మరింత లోతైన పరిశోధనలు అవసరమని పరిశోధకులు స్పష్టం చేశారు.

రక్తహీనత లక్షణాల్లో అలసట, నీరసం, తల తిరగడం, త్వరగా ఆయాసం రావడం, చర్మం పాలిపోయినట్లు కనిపించడం, ఏకాగ్రత తగ్గిపోవడం ఉన్నాయి. మైగ్రేన్ లక్షణాల్లో తలకు ఒకవైపు తీవ్రమైన నొప్పి, వికారం, వాంతులు, వెలుతురు లేదా పెద్ద శబ్దాన్ని తట్టుకోలేకపోవడం కనిపిస్తాయి. ఆకుకూరలు, పప్పులు, బీన్స్, బెల్లం, డ్రై ఫ్రూట్స్ వంటి ఐరన్ అధికంగా ఉండే ఆహారం తీసుకోవడం, తగినంత నీరు తాగడం, సరిపడా నిద్రపోవడం, ఒత్తిడిని తగ్గించుకోవడం మంచిదని నిపుణులు సూచిస్తున్నారు. తరచూ ఈ లక్షణాలు కనిపిస్తే వైద్యులను తప్పనిసరిగా సంప్రదించాలి.