బరువు తగ్గించే జీఎల్పీ-1 మందులు వాడుతున్నారా?

టైప్-2 మధుమేహం చికిత్స కోసం రూపొందించిన ఓజెంపిక్, మౌంజారో వంటి GLP-1 మందులు ప్రస్తుతం బరువు తగ్గేందుకు విస్తృతంగా ఉపయోగిస్తున్నారు. ఆర్థోపెడిక్ శస్త్రచికిత్స నిపుణుడు డాక్టర్ బ్రియాన్ న్వాన్నునూ ప్రకారం, ఈ మందుల వల్ల శరీర బరువు తగ్గడంతో మోకాళ్లపై పడే ఒత్తిడి తగ్గి, కీళ్ల నొప్పులు గణనీయంగా తగ్గే అవకాశం ఉంటుంది. దీంతో చాలామందికి కదలికలు సులభమవుతాయి.

అయితే బరువు తగ్గే సమయంలో కండరాల మాస్ కూడా తగ్గే ప్రమాదం ఉందని ఆయన హెచ్చరించారు. దీని వల్ల కీళ్ల స్థిరత్వం, ఎముకల సాంద్రత తగ్గి గాయాలు, ఆస్టియోపోరోసిస్ వంటి సమస్యల ప్రమాదం పెరగవచ్చని పేర్కొన్నారు. ముఖ్యంగా వృద్ధులు, మెనోపాజ్ అనంతర మహిళలు ఎక్కువ జాగ్రత్తలు తీసుకోవాలని సూచించారు. సరిపడా ప్రోటీన్ తీసుకోవడం, రెసిస్టెన్స్ ట్రైనింగ్ చేయడం, వైద్యుల సలహాతోనే మందులు వాడాలని నిపుణులు సూచిస్తున్నారు.