‘రంగస్థలం’ కాంబో మళ్లీ రిపీట్‌!

‘పెద్ది’ సినిమా తర్వాత మెగా పవర్‌స్టార్‌ రామ్‌చరణ్‌ దర్శకుడు సుకుమార్‌తో కలిసి మరో చిత్రంలో నటించనున్నట్లు సమాచారం. గతంలో వీరిద్దరి కలయికలో వచ్చిన ‘రంగస్థలం’ బ్లాక్‌బస్టర్‌ విజయాన్ని అందుకోవడంతో, ఈ కొత్త ప్రాజెక్టుపై ఇప్పటికే భారీ అంచనాలు నెలకొన్నాయి. ఇటీవల ఓ జర్నలిస్టుతో జరిగిన సంభాషణలో మైత్రీ మూవీ మేకర్స్‌ నిర్మాత నవీన్‌ యెర్నేని ఈ సినిమా పూజా కార్యక్రమాన్ని ఈ నెలలో నిర్వహించనున్నట్లు తెలిపారు. చిత్రానికి సంబంధించిన అధికారిక ప్రకటన కూడా ఒకటి రెండు రోజుల్లో వెలువడుతుందని వెల్లడించారు.

ఈ సినిమా కథాంశం, జానర్‌ వివరాలను చిత్రబృందం ఇప్పటివరకు వెల్లడించలేదు. దీంతో సుకుమార్‌ ఎలాంటి కథను ఎంచుకున్నారనే ఆసక్తి అభిమానుల్లో నెలకొంది. ఈ చిత్రానికి సంగీత దర్శకుడిగా అనిరుధ్‌ రవిచందర్‌ పేరు ప్రముఖంగా వినిపిస్తున్నప్పటికీ, దీనిపై అధికారిక ప్రకటన రావాల్సి ఉంది. కథానాయికగా పలువురి పేర్లు ప్రచారంలో ఉన్నాయి. చిత్రబృందం అధికారిక ప్రకటన చేసిన తర్వాత మరిన్ని వివరాలు వెల్లడయ్యే అవకాశం ఉంది.