మరో డిఫరెంట్ రోల్ లో సూర్య?

స్టార్ హీరో సూర్య వరుస విజయాలతో మళ్లీ తన పూర్వ వైభవాన్ని అందుకున్నారు. తమిళంతో పాటు తెలుగులోనూ మార్కెట్‌ను బలపరుచుకున్న ఆయన, ఇదే ఏడాది మరో సినిమాతో ప్రేక్షకుల ముందుకు వచ్చేందుకు సిద్ధమవుతున్నారు. సూర్య కెరీర్‌లో 47వ చిత్రంగా తెరకెక్కుతున్న ఈ సినిమాకు దర్శకుడు జీతూ మాధవన్ దర్శకత్వం వహిస్తున్నారు. చాలా కాలం తర్వాత సూర్య పూర్తిస్థాయి పోలీస్ పాత్రలో కనిపించనున్నారనే ప్రచారం ఇప్పటికే ఉంది. తాజాగా ఈ చిత్ర కథకు సంబంధించి ఆసక్తికరమైన సమాచారం సినీ వర్గాల్లో చక్కర్లు కొడుతోంది. ఇందులో సూర్య ఓ చూపులేని పోలీస్ అధికారిగా కనిపిస్తారనే టాక్ వినిపిస్తోంది. ఓ కేసును దర్యాప్తు చేసే సమయంలో చూపు కోల్పోయిన ఆయన, కొన్నేళ్ల తర్వాత మళ్లీ తెరపైకి వచ్చిన ఓ మిస్టరీ కేసును ఛేదించేందుకు రంగంలోకి దిగుతారట. ఈ దర్యాప్తులో నజ్రియా ఫహద్, ప్రేమలు నటుడు నెస్లేన్ కూడా కీలకంగా భాగమవుతారని తెలుస్తోంది. ప్రయోగాత్మక పాత్రలకు సూర్య కొత్తేమీ కాకపోవడంతో ఈ కథపై అభిమానుల్లో ఆసక్తి మరింత పెరిగింది. అయితే ప్రచారంలో ఉన్న కథ నిజమా కాదా అనేది సినిమా విడుదల వరకు వేచి చూడాల్సిందే.