రవితేజ పారితోషిక ఒప్పందం...భారీ జాక్‌పాట్‌?

రవితేజ నటించిన ‘ఇరుముడి’ సినిమాకు సంబంధించిన పారితోషిక ఒప్పందం ఆయనకు భారీ ఆర్థిక ప్రయోజనాన్ని అందించినట్టు తెలుస్తోంది. సమాచారం ప్రకారం, రవితేజ రూ.8 కోట్ల స్థిర పారితోషికంతో పాటు సినిమా నైజాం హక్కులను కూడా ఒప్పందంలో భాగంగా పొందారు. విడుదలకు ముందు ఆ హక్కుల విలువ సుమారు రూ.7 కోట్లుగా ఉన్నట్టు సమాచారం. అయితే సినిమా సంచలన విజయం సాధించడంతో నైజాం హక్కుల విలువ భారీగా పెరిగినట్టు తెలుస్తోంది. ఇప్పటివరకు ఈ చిత్రం జీఎస్టీతో కలిపి రూ.53.76 కోట్ల షేర్ సాధించినట్టు నివేదికలు చెబుతున్నాయి. పూర్తిస్థాయి ప్రదర్శనలో సుమారు రూ.60 కోట్ల షేర్ అందుకునే అవకాశం ఉందని అంచనా.

జీఎస్టీ, ఇతర ఖర్చులు, పంపిణీదారుల కమీషన్ వంటి లెక్కలు తీసివేసిన తర్వాత నైజాం వ్యాపారం ద్వారా రవితేజకు సుమారు రూ.45–48 కోట్ల వరకు అందే అవకాశం ఉందని ప్రచారం జరుగుతోంది. విడుదలకు ముందు రూ.7 కోట్లుగా ఉన్న హక్కుల విలువతో పోలిస్తే ఇది భారీ పెరుగుదల. సాధారణ పద్ధతిలో పూర్తి పారితోషికం తీసుకుని ఉంటే ఆయనకు సుమారు రూ.25 కోట్ల వరకు మాత్రమే వచ్చేదని అంచనాలు ఉన్నాయి. నైజాం హక్కులను ఒప్పందంలో భాగంగా తీసుకోవడం వల్ల రవితేజకు భారీ ఆర్థిక ప్రయోజనం దక్కినట్టేనని చిత్ర పరిశ్రమ వర్గాల్లో చర్చ జరుగుతోంది.