అహాన్ శెట్టి ‘సంకి’లోకి ‘బోర్డర్ 2’ బ్యూటీ మేధా రాణా?

బాలీవుడ్ యువ నటుడు అహాన్ శెట్టి నటిస్తున్న భారీ ప్రాజెక్ట్ ‘సంకి’పై అంచనాలు పెరుగుతున్నాయి. ‘రుస్తుం’, ‘మిషన్ రాణిగంజ్’ వంటి చిత్రాలను తెరకెక్కించిన దర్శకుడు టీనూ సురేష్ దేశాయ్ ఈ యాక్షన్ లవ్ స్టోరీని రూపొందిస్తున్నారు. ఈ సినిమా నటీనటుల ఎంపికపై ఇప్పటికే పలు వార్తలు వినిపిస్తున్నాయి. తాజా సమాచారం ప్రకారం, ‘బోర్డర్ 2’తో గుర్తింపు తెచ్చుకున్న మేధా రాణాను ఈ చిత్రంలో హీరోయిన్‌గా ఎంపిక చేసినట్లు తెలుస్తోంది. ‘బోర్డర్ 2’ తర్వాత కొంత విరామం తీసుకున్న ఆమె, చివరకు ‘సంకి’ కథకు గ్రీన్ సిగ్నల్ ఇచ్చినట్లు సమాచారం.

ఈ పాత్ర కోసం మేధా రాణా గత రెండు నెలలుగా ప్రత్యేక వర్క్‌షాప్‌లతో పాటు కఠిన శిక్షణ తీసుకున్నట్లు వార్తలు వస్తున్నాయి. ప్రస్తుతం భోపాల్‌లో రహస్యంగా జరుగుతున్న షూటింగ్‌లో ఆమె కూడా పాల్గొంటున్నట్లు తెలుస్తోంది. సినిమాలో అహాన్ శెట్టితో కలిసి రొమాంటిక్ సన్నివేశాలతో పాటు భారీ యాక్షన్ సీక్వెన్స్‌లలోనూ మేధా కనిపించనుందని టాక్. ‘బోర్డర్ 2’లో వేర్వేరు జంటలుగా కనిపించిన అహాన్, మేధా.. ‘సంకి’లో తొలిసారి జంటగా తెరపై సందడి చేయనున్నారు. వి ద పీపుల్, రోరింగ్ రివర్ ప్రొడక్షన్స్ సంస్థలు నిర్మిస్తున్న ఈ చిత్రాన్ని 2027లో విడుదల చేయాలని మేకర్స్ ప్లాన్ చేస్తున్నారు. త్వరలోనే ఫస్ట్ లుక్‌ను విడుదల చేసే అవకాశం ఉందని సమాచారం.