జయకృష్ణ రెండో సినిమాకు మరో హిట్ డైరెక్టర్?

ఘట్టమనేని వారసుడు జయకృష్ణ ఘట్టమనేని ‘శ్రీనివాస మంగాపురం’ చిత్రంతో హీరోగా పరిచయమైన విషయం తెలిసిందే. అజయ్ భూపతి దర్శకత్వంలో తెరకెక్కిన ఈ మాస్‌ కథాచిత్రం ఆశించిన విజయాన్ని అందుకోలేకపోయింది. విడుదలకు ముందు ట్రైలర్‌కు కూడా పెద్దగా స్పందన రాలేదు. అయితే తొలి సినిమానే అయినప్పటికీ జయకృష్ణ తన నటనతో మెప్పించి మంచి మార్కులు సాధించారు. ప్రస్తుతం ఆయన రెండో సినిమాకు సరైన కథ కోసం అన్వేషిస్తున్నారు. దీంతో ఆయన తదుపరి ప్రాజెక్ట్‌పై సినీ వర్గాల్లో ఆసక్తి నెలకొంది.

సూపర్‌స్టార్ కృష్ణకు వీరాభిమాని, మహేష్ బాబుతో పలు చిత్రాలను నిర్మించిన నిర్మాత అనిల్ సుంకర జయకృష్ణ రెండో సినిమాను నిర్మించేందుకు ఆసక్తి చూపిస్తున్నట్లు సమాచారం. ఏకే ఎంటర్‌టైన్‌మెంట్స్ బ్యానర్‌పై ‘సామజవరగమనా’, ‘నారీ నారీ నడుమ మురారీ’ వంటి విజయవంతమైన చిత్రాలను తెరకెక్కించిన యువ దర్శకుడు రామ్ అబ్బరాజుతో ఈ ప్రాజెక్ట్‌పై చర్చలు జరుపుతున్నట్లు తెలుస్తోంది. ప్రస్తుతం ‘సామజవరగమనా 2’ షూటింగ్‌లో ఉన్న రామ్ అబ్బరాజు, జయకృష్ణ కోసం కథ సిద్ధం చేస్తున్నట్లు సమాచారం. అన్నీ అనుకూలిస్తే వచ్చే ఏడాది ఈ ప్రాజెక్ట్ పట్టాలెక్కే అవకాశం ఉంది.