

మలయాళ స్టార్ దుల్కర్ సల్మాన్ నటించిన తాజా తెలుగు చిత్రం ‘ఆకాశంలో ఒక తార’ నేడు పలు భాషల్లో ప్రేక్షకుల ముందుకు వచ్చింది. గత రాత్రి నిర్వహించిన పెయిడ్ ప్రీమియర్ షోల అనంతరం ఈ సినిమాకు అద్భుతమైన స్పందన వస్తున్నట్లు సమాచారం. సినిమాలో నటీనటుల ప్రదర్శన, సాంకేతిక విలువలు, నిర్మాణ నాణ్యతపై ప్రేక్షకులు ప్రశంసలు కురిపిస్తున్నారని సినిమా వర్గాలు చెబుతున్నాయి. ఈ చిత్రానికి పవన్ సాధినేని దర్శకత్వం వహించగా, గున్నం గంగరాజు స్క్రీన్ప్లే అందించారు. సాత్విక వీరవల్లి ఈ సినిమాతో కథానాయికగా పరిచయమవుతున్నారు. ప్రీమియర్ షోలు చూసిన పలువురు ప్రేక్షకులు ఈ ఏడాది తాము చూసిన ఉత్తమ చిత్రాల్లో ఇదొకటిగా అభివర్ణిస్తున్నట్లు తెలుస్తోంది. అయితే, ఈ పాజిటివ్ టాక్ బాక్సాఫీస్ వద్ద ఎలాంటి ఫలితాన్ని అందుకుంటుందో వేచి చూడాలి.
ఈ చిత్రంలో దుల్కర్ సల్మాన్, సాత్విక వీరవల్లితో పాటు శ్రుతి హాసన్, రుహాని శర్మ, గౌతమ్ వాసుదేవ్ మీనన్, మురళీ శర్మ తదితరులు కీలక పాత్రల్లో నటించారు. లైట్బాక్స్ మీడియా ఈ చిత్రాన్ని నిర్మించగా, గీతా ఆర్ట్స్ (అల్లు అరవింద్), స్వప్న సినిమా (స్వప్న దత్), వైజయంతీ మూవీస్ సమర్పిస్తున్నాయి. జీవీ ప్రకాశ్ కుమార్ ఈ సినిమాకు సంగీతం అందించారు. కథలోని భావోద్వేగాలను మరింతగా ప్రేక్షకులకు చేరువ చేసేలా సంగీతం ఉంటుందని చిత్ర బృందం భావిస్తోంది. ప్రీమియర్ షోల నుంచి వస్తున్న పాజిటివ్ స్పందనతో సినిమాపై అంచనాలు పెరిగాయి. మరి ఈ చిత్రం ప్రేక్షకుల ఆదరణతో పాటు బాక్సాఫీస్ వద్ద ఎలాంటి విజయాన్ని అందుకుంటుందో చూడాలి.















కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!